Табаҕалар бөһүөлэккэ социальнай эбийиэк аҕыйаҕын бэлиэтииллэр

Олунньу 29 күнүгэр Табаҕа нэһилиэгин иннигэр Олохтоох дьаһалта 2023 сыл түмүгүнэн отчуотун куорат баһылыгын солбуйааччы Антон Алексеенко оҥордо. 
Табаҕа нэһилиэгэр былырыын Комсомольскай, Строительнай уулуссаларга хапытаалынай өрөмүөн ыытыллыбыт. Эргэ Табаҕаҕа Центральнай уулусса хапытаалынай өрөмүөнүн бастакы уочарата түмүктэммит.
Нэһилиэк орто оскуолатыгар федеральнай бырагырааманан хапытаалынай өрөмүөн ыытыллыбыт, Центральнай уулуссаҕа сылаас тохтобул тутуллубут, Лесная уулуссаҕа уот тардыллыбыт. Кэлэр сылга уочаракка Новая уулусса турар. Маны сэргэ «Уһук Илиҥҥэ 1000 тиэргэн» бырагырааманан Комсомольскай уул., 11 тиэргэн тупсарыыта ыытыллыбыт.
Быйыл олохтоох көҕүлээһиннэри өйөөһүн чэрчитинэн оҕо саадын тиэргэнигэр суол быраабылатыгар үөрэтэр балаһаакка, «Росточек» сайдыы киинин интерактивнай уонна мультимедийнай тэрилинэн хааччыйыы күүтүллэллэр. Оттон оскуола тиэргэнигэр аспаал кутуллара, дьоҕус архитектура оҥоһуктарын туруоруу былааннанар. 
«Норуот бүддьүөтэ» муниципальнай бырагырааманан «Ыра санаа музыкальнай саалата» бырайыак олоххо киириэҕэ, «Родничок» 103 №-дээх оҕо саадыгар музыка хоһун тэрийиэхтэрэ. 
Бөдөҥ эбийиэктэртэн бөһүөлэк территориятыгар өрөспүүбүлүкэ таһымнаах симиэнэҕэ 350 миэстэлээх «Хотугу сулус» Оҕо сынньалаҥ лааҕырын тутуу түмүктэниэҕэ. 
Оттон отчуот кэнниттэн олохтоохтор иһэр уу хаачыстыбатын тупсарыыга, Покровскайдыыр суол 25 км саҕалаан Табаҕа бөһүөлэгэр диэри суол алдьаныыларын абырахтааһыҥҥа, Центральнай уулуссаны тутуу болдьоҕор, уулуссаларга уоту тардыыга, анал байыаннай дьайыы кыттыылаахтарын уонна кинилэр дьиэ кэргэттэрин сир учаастактарынан хааччыйыыга  сыһыаннаах ыйытыылары биэрдилэр. Хаарбах дьиэттэн көһөрүү, Өлүөнэ муостатын тутуу, халаантан харыстыыр үлэ эмиэ болҕомто киинигэр турдулар, диэн иһитиннэрэр Олохтоох дьаһалта пресс-сулууспата.