Төрөөбүт тылбыт педагогтарыгар бириэмийэ олохтонно

Бүгүн, олунньу 13 күнүгэр, өрөспүүбүлүкэҕэ СӨ бастакы бэрэсидьиэнэ Михаил Николаев ыйааҕынан 1996 сыллаахха олохтоммут Төрөөбүт тыл уонна сурук-бичик күнүн бэлиэтиибит. Куорат баһылыга, бырааһынньыгынан эҕэрдэлээн туран, бастыҥ учууталларга 100 тыһыынча солкуобайдаах анал бириэмийэ олохтоммутун биллэрдэ.

«Убаастабыллаах куорат олохтоохторо, күндү биир дойдулаахтарым, эһигини ис сүрэхпиттэн кэрэ-бэлиэ бырааһынньыгынан – Төрөөбүт тыл уонна сурук-бичик күнүнэн эҕэдэлиибин! Педагогтарбытыгар, учуонай-чинчийээччилэргэ, култуура деятеллэригэр, төрөөбүт тылбытын уонна элбэх араас омуктаах өрөспүүбүлүкэбит норуоттарын төрөөбүт тылларын харыстыырга, сайыннарарга кылааттарын киллэрээччилэргэ сыралаах үлэҕит иһин махталбын тиэрдэбин.  Итиннэ сүрүн оруолу дьиэ кэргэн, төрөппүттэр толороллор диэн эрэллээхпин: биһиги оҕолорбут төрөөбүт тылларынан үөрэнэ, саҥара, толкуйдуу, айа-тута сатыыр дьулуурдарын өйүөхтээхпит», — диэн эҕэрдэлээтэ социальнай ситимнэргэ куорат баһылыга.

Евгений Григорьев иһитиннэрбитинэн, саха тылын, литературатын уонна национальнай култууратын бастыҥ педагогтарыгар 100 тыһыынча солкуобайдаах анал бириэмийэни олохтуур туһунан Уураахха Педагог уонна настаабынньык сылын чэрчитинэн илии баттанна. Бастакы бириэмийэлэр хаһаайыттара, куонкурус түмүгүнэн, Өрөспүүбүлүкэ күнүн көрсө, 2023 сыл муус устар 27 күнүгэр диэри биллиэхтэрэ.