Сырдыкка тахсар туом оҥоһулунна

Өксөкүлээх Өлөксөй аатынан Норуоттар доҕордоһууларын дьиэтигэр бу күҥҥэ аналлаах улахан тэрээһин буолан ааста.

Тэрийээччилэр Кулан Хаан салайыытынан кулун тутар 21 күнүгэр сарсыарда 06:00 чааска мустаммыт, Туймаада хочо ытык сиригэр Чочур Мырааҥҥа тахсаммыт саҥа күнү көрсөн, тэрээһин этэҥҥэ буоларыгар  алгыстанан, арчыланан, сир-дойду иччилэриттэн көҥүл, көмө ылан, буор куппутун бөҕөргөтөн кэлбиппит.

Сарсыарда 09.00 чаастан "Билиибин-көрүүбүн – бар дьоммор" тэрээһиҥҥэ кэлбит хас биирдии киһини арыылаах алаадьынан, кырылыы сылдьар кымыһынан тыыннаах доҕуһуол – кырыымпа тыаһынан көрсөн, ураты сахалыы эйгэ түстэннэ.

Өксөкүлээх Өлөксөй аатынан дьиэ иккис этээһигэр сарсыардаттан ньиргиччи үлэлии турар быыстапка көрүстэ. Манна саха киһитэ үүнэригэр-сайдарыгар араас хайысханан үлэлии сылдьар уһуйааннар, түмсүүлэр, кулууптар  бэйэлэрин билиилэрин бар дьоҥҥо билиһиннэрдилэр. Кут-сүр чөллөнүүтүгэр үлэлэһэр “Алгыстаах аартык» (Алгыс Уйбаан), Байдам Сыдьаайа уһуйааннара, Күн Боотуровна "Эрэл" бырайыага, эти-сиини чөллүүр, чэбдигирдэр "Чысхаан" Киин (Егор Кирсанов), "Отшельник" кулууп (Айаал Акимов), тоһоҕоҕо туруу дьарыктара (Владимир Маччасынов), «Эргис” аппараатынан Күннээх Ымыы Хайбаана, "Чөмчүүк саас" оҕо сайдар киинэ кыттыыны ыллылар. Быыстапка кыттааччылара практиканан көрдөрөн, дьон интэриэһин тартылар, ыйытыыларга хоруйдаатылар, сүбэ-ама биэрдилэр.

Төһө да үлэ күнэ буоллар, сарсыарда эрдэттэн дьон-сэргэ тоҕуоруһа мустан, тэрээһин өрө көтөҕүллүлээхтик саҕаланна. Улахан кэнсиэртиир саалаҕа дьон баппакка, ким туран, ким муостанан олорон Кулан Хаан Байаҕантай, Алгыс Уйбаан алгыстарын ылан, ыраастаныы, арчыланыы, ол кэннэ оһуохай ыытылынна.

Эбиэт кэнниттэр үс сиринэн хайдыһан, ким баҕатынан саалаларга тарҕастылар. Тэрээһин "Билиибин-көрүүбүн бар дьоммор аныыбын" диэн аата да этэринии, бар дьоннорун туһугар үлэлии-хамсыы сылдьар дьоммут бэйэлэрин билиилэрин үллэһиннилэр. Икки сааланан өркөн өйдөөхтөрбүтүн, саха үүнэрин-сайдарын туһугар үлэлии-хамсыы сылдьар дьоммутун мустубут дьон утаппыттыы иһиттилэр. Быыстапка саалатыгар "Чыпчаал" тренажеру, "Эргис" аппараты, тоһоҕоҕо турууну сөҕө-махтайа көрдүлэр-иһиттилэр. "Отшельник" чэй иһии кулууба мустубут ыалдьыттары бэйэтин минньигэс чэйинэн күндүлээтэ.

Бу улахан тэрээһин Александр Протодьяконов, Альбина Аммосова, Егор Кирсанов, Маргарита Степанова (Акимова), "Отшельник" кулуупка, "Чыпчаал" эти-сиини чэбдигирдэр кииҥҥэ сылдьар, дьарыктанар ыччат дьон улахан көмөлөрүнэн тэрилиннэ. Тэрээһини сүрүннээбит, сүбэлээбит, муоһатын туппут киһинэн Кулан Хаан Байаҕантай буолар.

Бука бары биир санаалаахтар мустаммыт, аҕыйах кэм иһигэр бэйэ-бэйэбитин ситэрсэн, толорсон, сүбэлэһэн, бар дьоммутугар чахчы да наадалаах саҕалааһын буолбутуттан астынныбыт, үөрдүбүт. Тэрээһин биир уратытынан ыччакка өбүгэ муудараһын, кут-сүр өйдөбүллэрин, эти-хааны чэбдигирдии ньымаларын, бэйэ ис дьиҥин булунуу муудараһын тиэрдии буолар.

Өксөкүлээх Өлөксөй аатынан Норуоттар доҕордоһууларын дьиэтин дириэктэрэ А.Н. Корякина бу тэрээһин сыл аайы кулун тутар 21 күнүгэр тэриллэ туруоҕар баҕа санаатын биллэрбититтэн күүспүтүгэр өссө күүс эбилиннэ.

Бука бары  кыттыыны ылбыт дьоммутугар, ыалдьыттарбытыгар тэрийэр бөлөх аатыттан махталбытын тиэрдэбит.

Бу күн билиилэрин-көрүүлэрин үллэстибит дьоммутунуун аһаҕас кэпсэтиилэр, маастар кылаастар, уһуйааннар иилэринэн үлэ салҕаныаҕа.