Сылтан сыл кыттааччы маастарыстыбата үрдүүр

Кулун тутар 22 күнүгэр Хатастааҕы П.Н. уонна Н.Е. Самсоновтар ааттарынан орто оскуолаҕа Бүтүн Арассыыйатааҕы «Профессионалы-2024» идэтийии маастарыстыбатыгар чемпионат «Агрономия» хайысхатын өрөспүүбүлүкэтээҕи түһүмэҕэ түмүктэннэ. Хайысха үс компетенциятыгар үһүөннэригэр Хатас оскуолатын үөрэнээччилэрэ бастаатылар.

«Сити-фермерство» компетенцияҕа бастакы миэстэ – Тимур Трофимов, «Агрономия» хайысха кыайыылааҕа – Георгий Гаврильев, «Флористикаҕа» – Мичийээнэ Бурцева. Үөһэ этиллибитин курдук, бары Хатастааҕы П.Н. уонна Н.Е. Самсоновтар ааттарынан орто оскуола үөрэнээччилэрэ.

Диана Дмитриевна Васильева, Хатастааҕы П.Н. уонна Н.Е. Самсоновтар ааттарынан орто оскуола дириэктэрин агротехнологическай хайысхаҕа солбуйааччыта, «АгроКуб» салайааччыта, «Флористика» компетенция сүрүн экспердэ:

– Биһиги оскуолабыт бу хамсааһыҥҥа 2017 сылтан киирсэр. Бастаан «Агрономия» эрэ компетенция баара, 2020 сыллаахтан «Сити-фермерство» эбиллибитэ, 2022 сылтан «Флористика» хайысхата баар буолбута. Былырыыҥҥыттан, 2023 сылтан, күрэхпит нууччалыы «Профессионалы» диэн ааттанна.

Бу чемпионаты оҕолор олус сөбүлүүллэр, интэриэһиргииллэр. Холобура, «Сити-фермерство» диэҥҥэ гидропоннай тэрили таҥарга, автоматизациятын бырагыраамалыырга үөрэнэллэр. Онон куонкурус бары хайысхалара оҕолорго наһаа туһалаах, бэйэлэрин идэҕэ холонон көрөллөрүгэр, сатабылларын сайыннаралларыгар уһуйар. Үөрүүбүт диэн – оскуолабыт үөрэнээччилэрэ быйылгы күрэх компетенцияларыгар барыларыгар кыайыылааҕынан тахсан, өрөспүүбүлүкэ сүүмэрдэммит хамаандатыгар киирэр, Арассыыйа таһымыгар кыттар кыахтанныллар. Быйыл кыттааччыларбыт, настаабынньыктарбыт, көмөлөспүт кэллиэгэлэрбит олус күүскэ бэлэмнэммиттэрин, киирсибиттэрин бэлиэтиэхпин баҕарабын. Өрөспүүбүлүкэ оскуолаларыттан улахан сүүмэрдээһини ааспыт оҕолор кыттыбыт буоланнар, бүтэһигэр диэри ким кыайара биллибэт этэ. 12 улуустан сайаапка киирбит буоллаҕына, биһиги онлайн көрүҥүнэн эбии сүүмэрдээһини ыытаммыт, түмүккэ биирдии хайысхаҕа биэстии оҕо кытынна.

Быйыл куонкурус хаачыстыбата быдан үрдээтэ. Үксэ агрооскуола оҕолоро кытыннылар, икки түһүмэхтээх сүүмэрдээһини аастылар. Араас улуустартан бааллар. Ол курдук, «Флористиканы» ылан көрдөххө, Ньурба, Бүлүү, Уус Алдан, Амма, Дьокуускай кытыннылар, «Агрономияҕа» – Мэҥэ Хаҥалас, Хаҥалас,  Уус Алдан үөрэнээччилэрэ.

Бүтүн Арассыыйатааҕы «Профессионалы-2024» идэтийии маастарыстыбатыгар чемпионат өрөспүүбүлүкэтээҕи түһүмэҕэ олунньу 14 - кулун тутар 30 күннэригэр 980 кыттааччылаах, 780 эксперт-уһуйааччылаах Дьокуускай, Мииринэй, Нерюнгри, Алдан куораттарга, Хаандыгаҕа, Эдьигээҥҥэ, Тиксиигэ, Дьааҥыга, Аллараа Бэстээххэ 30-ча балаһаакканан ыытыллар. Быйылгы күрэх компетенцията 138-тан 150-ҥа тиийэ элбээбит. Саҥа хайысхалар ортолоругар «Художественная резьба по дереву», «Судоремонт», «Печное дело», «Зоотехния» о.д.а. бааллар.

Өрөспүүбүлүкэтээҕи түһүмэх кыайыылаахтара салгыы Арассыыйа таһымыгар кытта бараллар.