Сылаас тохтобуллары харабыллааһын күүһүрүөҕэ

Дьокуускайга вандааллар 24-тэн тоҕус сылаас тохтобулу алдьаппыттар. Итинтэн үс тохтобулга чөлүгэр түһэрии үлэтэ ыытыллыбыт, алта тохтобул өрөмүөннэнэр.

Холобур, алтынньы 10 күнүгэр  Можайскай уулуссатыгар баар «Гагарин скверэ» сылаас тохтобултан монитору уонна видеокамера регистраторын уорбуттар, ааны алдьаппыттар.

«Куорат полициятын уопсастыбаннай бэрээдэги араҥаччылыыр салаатын начаалынньыга Николай Тастыгинныын ити эбийиэктэргэ куттал суоһаабытын хааччыйар үлэбитин уларытан, буруйу оҥорооччулары көрдөөһүнү күүһүрдүөх буолан дуогабардастыбыт. Ити холуобунай буруй, баайы-дуолу алдьатыыны сэргэ уоруу тахсар, монитордары, ититии систиэмэтин уораллар, видеонан кэтээн көрүүнү алдьаталлар. Куорат олохтоохторугар туһаайан көрдөһүөм этэ, сылаас тохтобуллары алдьатыы уонна уоруу туһунан тугу эбит билэр буоллаххытына полицияҕа тиийиҥ, барыта анонимнай буолуоҕа диэн мэктиэлиибит», - диэн бэйэтин телеграм-ханаалыгар куорат баһылыга Евгений Григорьев суруйда.

Манна даҕатан эттэххэ, баайы-дуолу соруйан алдьатыы иһин РФ Холуобунай кодексатын 167-с ыстатыйатыгар олоҕуран, 5 сылга диэри көҥүлү быһыы көрүллэр, оттон баайы-дуолу уоруу иһин РФ Холуобунай кодексатын 158-с  ыстатыйатын 2-с чааһыгар олоҕуран, 5 сылга диэри көҥүлү быһаллар.

Көһө сылдьар мунньах түмүгүнэн оптуобус сылаас тохтобулларын харабыллааһыны күүһүрдэр быһаарыы ылылынна. Куорат баһылыга «Главстрой» МХТ салалтатыгар инники өттүгэр саҥа сылаас тохтобуллары туталларыгар, бырайыактарын уларытан, вандааллартан көмүскэллээх буоларын ситиһэллэригэр сорудахтаата.