Сыл саҥатыттан 411 дьэллик ыт тутулунна

Сылын аайы дьэллик ыттары тутарга «Помоги выжить» аһымал пуондатын икки биригээдэтэ, Дьэллик кыыллары кытта үлэлиир сулууспа үс уонна «Огонеров» ИП икки биригээдэлэрэ тахсаллар.

Олохтоох дьаһалта Территориялары кытта үлэлиир департаменын начаалынньыга Владислав Слепцов бэлиэтээбитинэн, салалта территориальнай уорганнарын үлэһиттэрэ дьэллик ыттары тутарга көмөлөһөллөр.

«Дьэллик кыыллары тутар штаб күн аайы үлэлиир, Биир кэлим диспетчерскэй сулууспаҕа, Дьокуускай муниципальнай киинигэр уонна социальнай ситимнэргэ киирбит сайаапкалары үөрэтэбит. Бүгүҥҥү күҥҥэ Дьэллик кыыллары тутар пууҥҥа 1342 ыт баар», - диэн  иһитиннэрдэ Владислав Слепцов.

Ааспыт нэдиэлэҕэ ыттары босхо ыыппыт хаһаайыттарга сыһыаннаах 6 боротокуол толорулунна. Сыл саҥатыттан 28 итинник боротокуол оҥоһулунна. Күн аайы ыытыллар эриэйдэлэргэ салалта территориальнай уорганнарын үлэһиттэрэ, СӨ Ветеринарияҕа  департаменын уонна ИДьМ «Якутское» управлениетын бэрэстэбиитэллэрэ кытталлар.

Санатар буоллахха, өрөспүүбүлүкэ территориятыгар дьиэ кыылларын иитии быраабылаларын кэһии иһин ыстараап көрүллэр. Ол курдук, Саха сирин Бырабыыталыстыбатын 2014 атырдьах ыйын 1 күнүнээҕи 237 №-дээх Уурааҕынан, гражданнар административнай эппиэтинэскэ тардыллаллар, быраабыланы бастакы төгүлүн кэспит буоллахтарына 1000-1500 солкуобай, оттон хаттаан кэһиигэ 3000-5000 солкуобай ыстарааптаналлар. Боротокуолу СӨ Ветеринарияҕа  департаменын территориальнай салааларын судаарыстыбаннай инспектордара толороллор.

Дьэллик кыыллар тустарынан хаартысканан-видеонан информацияны, аадырыстарын ыйан туран, муниципальнай киин чат-ботыгар 8(914) 261-06-98 нүөмэринэн ыытаҕыт. Телеграм ханаал https://t.me/mtsuykt.

Биир кэлим диспетчерскэй сулууспа нүөмэрэ: 44-42-51.