Сыл саҕаланыаҕыттан 5 433 кырачаан күн сирин көрдө

Быйылгы Туймаада ыһыаҕын күнэ историяҕа Саха сирин нэһилиэнньэтэ мөлүйүөҥҥэ тиийбитинэн өйдөнөн хаалара саарбаҕа суох. 
Оттон Ил Дархан уонна бырабыыталыстыба пресс-сулууспата иһитиннэрэринэн, сыл саҕаланыаҕыттан өрөспүүбүлүкэ нэһилиэнньэтэ 5433 киһинэн элбээбит: 2761 уол уонна 2672 кыыс. Ол иһигэр аҥаардас бэс ыйыгар 640 кырачаан күн сирин көрбүтүттэн 312 — уол, 327 — кыыс. 
Оттон ЗАГС управлениетын чахчытынан, бэс ыйыгар төрөөбүт оҕолору сүрүннээн Александр, Артём, Богдан, Вячеслав, Давид, Дамир, Марк, Максим, Тимур, Эркин уонна Эрхан, кыргыттарга Алиса, Виктория, Дарина, Ева, Милана, Мия, Оливия, Сайаана уонна София диэн ааттаабыттар.

Санатар буоллахха, Ил Дархан Айсен Николаев былырыын Саха АССР төрүттэммитэ 100 сылынан олохтоммут 100 тыһ. солк. кээмэйдээх тус сыаллаах төлөбүрү биэс сылга диэри уһатан биэрбитэ. Төлөбүр кээмэйэ индексация суотугар билигин 105 тыһ. солк. тэҥнэһэн турар. 
Төрөппүттэр анаммыт үбү сүрүннээн олорор усулуобуйаны тупсарыыга (316,4 мөл. солк. кээмэйдээх 3 913 сайабылыанньа) уонна тырааныспар атыылаһыытыгар туһаҕа таһаараллар (110,9 мөл. солк. суумалаах 1 233 сайабылыанньа), маны сэргэ 33 ыал анаммыт харчыны оҕо аатыгар счет арыйан укпут, 31 ыал кэтэх хаһаайыстыбатын кэҥэтиигэ туһаммыт, 18 ыал оҕоҕо үрдүк технологиялаах көмөнү оҥорууга ороскуоттаабыт, 8 ыал Арассыыйа иһинэн күүлэйдээн кэлбит, 8 ыал — оҕо үөрэҕэр туһаҕа таһаарбыт. Быйылгыттан бэриллэр харчыны дьиэҕэ гаас киллэртэриигэ туһаныаха сөп. 

СӨ Ил Дарханын уонна Бырабыыталыстыбатын пресс-сулууспатын хаартыската