«Сыл маастара» куонкурус салҕанар

Тула куоракка «Сыл маастара» Бүтүн Арассыыйатааҕы куонкурус финалистара иккис тургутуулара түмүктэннэ. Бастакы түһүмэххэ, 15 хамаандаҕа арахсан, үөрэҕирии «кейстарын» быһаарбыттара. Кыттааччылар сорудах кэллиэгэлэрин билиилэрин, сатабылларын сыаналыырга көмөлөспүтүн бэлиэтээбиттэрэ.

Иккис түһүмэххэ Арассыыйа Федерациятын 89 субъегын кыайыылаахтара устудьуоннарга аналлаах аһаҕас дьарыгы ыыттылар. Күрэхтэһии 12 балаһаакканан ааста. Кыттааччылар үөрэтиигэ ураты ньымаларын уонна устудьуоннары практическай өттүнэн бэлэмниир технологиялары баһылаабыттарын көрдөрдүлэр.

Саха сирин аатыттан Дьокуускайдааҕы Ю.А.Готовцев аатынан сервис технологическэй техникумун производственнай үөрэтиигэ маастара Зоя Готовцева кыттар. Аһаҕас уруокка Зоя Ивановна Тула устудьуоннарыгар эрэстэрээн  молекулярнай куукунатын туһунан кэпсээтэ.

«Аһаҕас уруок» куонкурус федеральнай экспертнэй хамыыһыйатын састаабыгар Саха сириттэн киирдилэр:

Иванова Лилия Михайловна, Профессиональнай үөрэхтээһини сайыннарар институт дириэктэрэ;

Алексеев Дмитрий Афанасьевич, Дьокуускайдааҕы медицинскэй колледж дириэктэрэ;

Новикова Александра Алексеевна, Дьокуускайдааҕы медицинскэй колледж дириэктэрин инновационнай үлэҕэ солбуйааччыта;

Филиппова Фаина Семеновна, Дьокуускайдааҕы медицинскэй колледж преподавателэ;

Халдеева Татьяна Дмитриевна, Дьокуускайдааҕы Ю.А.Готовцев аатынан сервис технологическэй техникумун методиһа.

Аһаҕас уруок түмүгүнэн уон финалист биллиэҕэ, кинилэр куонкурус тиһэх түһүмэҕэр тахсыахтара. Тиһэх түһүмэххэ маастар-кылааһы көрдөрүөхтэрэ. Кыайыылаах 200 тыһыынча суумалаах бирииһинэн наҕараадаланыаҕа.