Сыл бүтүөр диэри икки мурал оҥоһуллуоҕа

Өрөспүүбүлүкэ Ыччат дьыалаларыгар уонна социальнай коммуникацияларга миниистирэ Петр Шамаев  информациятынан, Дьокуускай куорат 21-с №-дээх оскуолатыгар «Алеша» тааҥка экипааһыгар анаммыт муралы оҥоро сылдьаллар. Муралга байыаннай массыына хамаандата – өрөспүүбүлүкэбит олохтоохторо Филипп Евсеев уонна Алексей Неустроев ойууланыахтара.

Миниистир иһитиннэрбитинэн, киин куорат медицинскэй колледжыгар Сэбиэскэй Сойуус Героя Екатерина Деминаҕа анаммыт композицияны оҥороллор.

1941 сыллаахха Екатерина Демина тохсус кылаас кэнниттэн сиэстэрэлэр куурустарын үөрэнэн бүтэрбитэ. 15 саастаах кыысчаан байыаннай комиссариакка тиийэн, сааһыгар үс сыл эбинэн, уоттаах сэриигэ барбыта. Екатерина «Красная Москва» байыаннай-санитарнай суудунаҕа сулууспалаабыта. Онтон  муора пехотатын 369-с батальоныгар санинструктордаабыта. Байыастары кытта тэбис-тэҥҥэ сэриилэһэрэ, бааһырбыттары сэрии хонуутуттан таһаартаан бастакы көмөнү оҥороро, бэйэтэ үс төгүл бааһырбыта.

Кинини үстэ Сэбиэскэй Сойуус Героя оҥорорго сурук түһэрбиттэрэ, ол эрэн 1990 сыл ыам ыйыгар эрэ, ССРС бэрэсидьиэнин ыйааҕынан, Герой оҥорбуттара.