07.08.2021 | 13:00

Суол оҥоһуута салҕанар

Суол оҥоһуута салҕанар
Ааптар: Айыына ДОНСКАЯ
Бөлөххө киир

Киин куоракка  «Куттала суох уонна хаачыстыбалаах суоллар» национальнай бырайыак чэрчитинэн суоллары оҥоруу тэтимнээхтик барар. От ыйын 29 күнүгэр, куорат суруналыыстара пресс-турга Пригороднайга уонна куорат уулуссаларыгар сылдьан суол тутуутун хаамыытын кытта билистибит.

Быйыл хаһааҥҥытааҕар да элбэх суол оҥоһуллан үлэҕэ киириэхтээх –  тутууга, саҥардан оҥорууга, капитальнай өрөмүөҥҥэ уонна өрөмүөҥҥэ 59 км усталаах 44 эбийиэк киирэ сылдьар, онтон аҕыһа 11 км тахса быстах суоллар. Бүгүҥҥү күннээҕи туругунан 17 км суол аспаалтааһына бүппүт. «Куттала суох уонна хаачыстыбалаах суоллар» национальнай бырайыак чэрчитинэн суолу сайыннарыыга бу сылга бүддьүөт харчытыттан 2,2 млрд солкуобай көрүллүбүт.

Суоллары көрөр айаҥҥа СӨ тырааныспарга уонна суол хаһаайыстыбатыгар миниистирин бастакы солбуйааччы Сергей Владимиров, «Главстрой» МКТ дириэктэрин солбуйааччы Афанасий Александров, «Автодор» РИК генеральнай дириэктэрэ Ариан Сидоров сырыттылар, ыытылла турар үлэ хаамыытын кытта билиһиннэрдилэр.

Пресс-тур чэрчитинэн Луговой, Иван Кульбертинов уулуссаларыгар,  Эргэ Покровскайдыыр суолга, Автодорожнай уокуругар Студенческай уонна Нагорнай уулуссаларга, Пригороднай сэлиэнньэтигэр Пляжнай, Набережнай уонна Совхознай уулуссаларга, итини сэргэ Эргийэр суолга (Окружной шоссе) ыытылла турар уонна түмүктэммит суол үлэлэрин көрдүбүт.

Иван Кульбертинов уулуссатыгар сири тэҥнээһин, үллэн тахсыбыт өттүн уларытыы, аспааллааһыҥҥа бэлэмнээһин оҥоһуллар.  Өрөмүөннэнэр учаастак уһуна – 2,2 км.

Автодорожнай уокурук көтөр фабрикатын микрооройуонугар Нагорнай уулуссатыгар айан уонна кытыы, туоруур суоллары аспааллааһын буола турар.  

Эргэ Покровскайдыыр суол өрөмүөнэ түмүктэнэрэ чугаһаабыт,  97,2%-на бүппүт. Манна үллэн тахсыбыт сирдэри уларытыы, кытыы уонна туоруур суоллары аспааллааһын, суолу дэхсилээһин үлэтэ барар.

Бэдэрээччик «Дорстрой»  ХЭТ Эргийэр суолга (Окружной шоссе) иккис хос аспааллааһын (аспаал иккис араҥата) уурулла сылдьар. Маны сэргэ бордюр, бэлэсэпиэт суоллара, тротуардар оҥоһуллаллар. Суол уопсай уһуна – 4,2 км.

СӨ тырааныспарга уонна суол хаһаайыстыбатыгар миниистирин бастакы солбуйааччы Сергей Владимиров иһитиннэрбитинэн, тутуу уонна капитальнай өрөмүөн былааныгар быйыл уулусса-суол ситимин 44 эбийиэгэ киирбит, итиннэ 2,2 млрд солк харчы көрүллүбүт. Бүгүҥҥү күннээҕи туругунан, 32 эбийиэккэ 8 бэдэрээччик тэрилтэ үлэлиир.

«Быйыл өрөмүөн үлэтэ хаһааҥҥытааҕар да күүскэ баран иһэр. Маннык тэтиминэн балаҕан ыйын ортотугар диэри куораты аспааллааһын үлэтин бүтэриэхпит уонна уулуссалары тупсаран оҥоруунан дьарыктаныахпыт. Холобур, «Автодор» РИК ылыныллыбыт былааныттан инникилээн иһэр. Быйыл суол үлэтэ саҕаланыан иннинэ ыытыллар тэрээһиннэр (торги) былааннаммыт болдьоххо ыытыллыбыттара, муниципальнай хантыраактар эмиэ бириэмэтигэр баттаммыттара. Ити таһынан, «Автодор» РИК күүстээх, бары өттүнэн ситэриллибит тиэхиньикэлээх уонна үлэтин суһаллык, түргэн тэтимнээхтик толорор», – диэн  кэпсиир СӨ тырааныспарга уонна суол хаһаайыстыбатыгар миниистирин бастакы солбуйааччы Сергей Владимиров.

Сүрүн бэдэрээччиктэртэн биирдэстэрэ – Ариан Сидоров салайааччылаах «Автодор» РИК.

Ариан Сидоров эппитинэн, кинилэр билигин 5 учаастакка 12,5 км суолу аспааллаан бүтэрбиттэр. Кини үлэ графикка сөп түбэһэн баран иһэрин бэлиэтээтэ.

«Биһиги үлэбитин бэс ыйын 1 күнүттэн саҕалаабыппыт. Бүгүн, от ыйын 29 күнүгэр ылсыбыт учаастактарбыт үлэтин – аспааллааһыны бүтүннүү бүтэрдибит. Билигин суол оҥоруута өссө 12,5 км суол Жуковскай, Авиатордар, Пилоттар, Покрышкин уулуссаларыгар уо.о.д.а. хаалла. Бүгүҥҥү күҥҥэ хаалааһына суох үлэлээн иһэбит, ол иһин бары эбийиэктэрбитин болдьоҕор уонна үчүгэй хаачыстыбалаахтык оҥорон туттарыахпыт диэн бигэ эрэллээхпин», – диир Ариан  Сидоров.

Билиҥҥи туругунан, Дьокуускай куоракка аспааллааһын 12 эбийиэккэ оҥоһуллан бүппүт. Ити Сайсары уокуругар Шевченко уонна Широких-Полянскай уулуссалара, Автодорожнай уокурукка – Студенческай уонна Луговой уулуссалар,  куорат таһынааҕы Пригороднайга – Набережнай, Пляжнай уонна Совхознай уулуссалар, Хатаска Каландаришвили, Кангалаас бөһүөлэгэр Молодежнай уонна баартыйа 26-с съеһин уулуссалара оҥоһуллан бүппүттэр. Ити эбийиэктэр бэдэрээччиктэринэн «Автодор» РИК буолар. Ону сэргэ Тулагы сэлиэнньэтигэр элбэх оҕолоох ыаллар олорор кыбартаалларыгар тиийэр суол оҥоһуллубут. Ити эбийиэк бэдэрээччигэ – «Альянс 2007» ХЭТ. Түмүктэммит үлэлэри тутуу былаана от ыйын 30 күнэ этэ.

«Главстрой» МКТ дириэктэрин солбуйааччы Афанасий Александров бэлиэтээбитинэн, суол капитальнай өрөмүөнэ, саҥардан оҥоруута уонна тутуута былааннаммыт графиктан инникилээн иһэр.

«Быйыл «Автодор» РИК 25 км суолу оҥоруохтаах. Бүгүҥҥү күҥҥэ 12 тыһыынча км ордук суолу өрөмүөннээн бүтэрдэ. Эрдэттэн оҥоһуллубут былаанынан бэдэрээччик куорат соҕурууҥу өттүттэн хоту өттүгэр баран иһэр. Тутар үлэтин тэрилтэ Марха микрооройуонугар түмүктүөҕэ», – диэн кэпсээтэ Афанасий Александров.

Биэс сыл иһигэр – 2019 сылтан 2024 сылга диэри «Куттала суох уонна хаачыстыбалаах суоллар» национальнай бырайыак чэрчитинэн куорат суолун 85%-на нуормаҕа эппиэтиир гына оҥоһуллуохтаах.

Сонуннар

Ордук ааҕаллар

Былатыан Эверстов:  «Элбэх дьоҥҥо сонуну кэпсиир кыахтаах буолар — дьол»
Дьон | 06.06.2024 | 10:00
Былатыан Эверстов: «Элбэх дьоҥҥо сонуну кэпсиир кыахтаах буолар — дьол»
Хас сир аайы ураты дьон баар буолар. Кинилэр олохторун хара маҥнайгыттан атыннык олоро сатыыллар. Барыларыгар баар курдук нус-хас дьылҕаҕа дураһыйбаттар. Оннук дьикти киһинэн Дьааҥы улууһугар олорор эрээри, өрөспүүбүлүкэ, дойду, аан дойду үгүс бэлиэ спортивнай түгэннэрин көтүппэккэ хамнаһа суох сырдатар суруналыыс, киэҥ сырыылаах айанньыт, коллекционер, фотограф, спортсмен, норуот тапталын ылбыт Платон...
Татьяна Гоголева:  «Төрөөбүт тылын билбэт ыччат ханна да сыаналаммат»
Дьон | 13.06.2024 | 10:00
Татьяна Гоголева: «Төрөөбүт тылын билбэт ыччат ханна да сыаналаммат»
«Хотугу сулус» оҕо телерадиоакадемиятын төрүттээбит, үгүс көлүөнэ талааннаах ыччаты көччөх гынан көтүппүт Татьяна Гоголева, чахчы, Саха сиригэр тыыннаах номох буолбут киһи. СӨ култууратын үтүөлээх үлэһитэ, СӨ култууратын, социальнай эйгэтин туйгуна, «Гражданскай килбиэн» бэлиэ хаһаайына олоҕун тухары оҥорбута, айбыта-туппута, үйэтиппитэ үгүс.   Кини туһунан бу иннинэ сурулунна ини, суруллубата ини. Ол эрээри...
Элбэх оҕолоохторго — ураты болҕомто
Сонуннар | 06.06.2024 | 16:00
Элбэх оҕолоохторго — ураты болҕомто
2024 сыл ыам ыйын 28 күнүгэр ыытыллыбыт Ил Түмэн сэттис (уочараты таһынан) пленарнай мунньаҕар норуот дьокутааттара «Саха Өрөспүүбүлүкэтигэр элбэх оҕолоох ыал статуһун туһунан» өрөспүүбүлүкэ сокуонугар уларытыылары киллэриини өйөөтүлэр.   Санатан эттэххэ, дойду баһылыга Владимир Путин 2024 сыл тохсунньу ыйыгар элбэх оҕолоох дьиэ кэргэттэр статустарын болдьоҕо суох оҥорбута. Ол эбэтэр үс уонна...
Арыгы атыытын бобуутун полиция үлэһиттэрэ хонтуруоллуохтара
Сонуннар | 08.06.2024 | 11:51
Арыгы атыытын бобуутун полиция үлэһиттэрэ хонтуруоллуохтара
Куорат баһылыга Евгений Григорьев дьаһалынан VIII-с «Азия оҕолоро» Оонньуулар ыытыллар кэмнэригэр бэс ыйын 25 күнүттэн  от ыйын 8 күнүгэр диэри Дьокуускай куоракка арыгылаах утах атыыта бобуллар. Ол эбэтэр бу күннэргэ арыгылаах утах атыытыгар идэтийэр эргиэн туочукалара сабыллаллар, атын маҕаһыыннарга арыгы атыылыыр отделлар үлэлээбэттэр.  Бу хаарчах арыгынан эргинэр кафе, ресторан, бар...