Строительнай уокурук кыһалҕаларынан мунньах көдүүстээхтик ааста

Ыам ыйын 18 күнүгэр баһылык Евгений Григорьев 8 Марта уул., 89/1 уонна 93 №№-дээх дьиэлэрин олохтоохторо кыттыылаах Строительнай уокурук кыһалҕаларынан мунньахтаата.
Көһө сылдьар мунньахха куорат прокурора Антон Николенко, куорат баһылыгын солбуйааччы Антон Алексеенко, уокурук управатын салайааччыта Василий Пинигин, Олохтоох дьаһалта, тэрилтэлэр, «Юнион» Салайар хампаанньа бэрэстэбиитэллэрэ кыттыыны ыллылар.
Мунньах сүрүн тиэмэтэ - Салайар хампаанньа эбээһинэһин ситэри толорбото, онуоха эбии өтөрүнэн түспэтэх элбэх хаартан намыһах сиргэ турар дьиэлэр эмсэҕэлээһиннэрэ. 
Ыйыллар аадырыстарга сыһыаннаан Куорат хаһаайыстыбатын дьаһайар сулууспа дириэктэрин солбуйааччы Светлана Чусовская иһитиннэрбитинэн, бу икки дьиэттэн Дальняй уулуссаҕа турар носуос ыстаансыйатыгар диэри уу сүүрэр лотоктара оҥоһуллаары турар эбит. Маны сэргэ Дальняя уул. Якутская уулуссаҕа диэри кэрчигэ оҥоһуллар былааннаах. 8 Марта уул. 93 аадырыстан носуос ыстаансыйатыгар диэри мотопомпанан чалбах уутун хачайдыыр быстах кэмҥэ үлэлиир ыстаансыйа оҥоһуллуохтаах. Оттон уокурук управата дьиэ анныгар уу киирбэтин хааччыйар кумах кутуутун бэйэтигэр ылынна. 
8 Марта, 89/1 дьиэтэ 2019 сыллаахха саахалланар туруктааҕынан билиниллибит уонна муниципальнай бүддьүөт суотугар аадырыстаах өрөспүбүүлүкэ бырагырааматыгар киирэр экспертизаны ааспыт.
Дьиэ 12 кыбартыыратыттан иккитэ – муниципальнай, уона чааһынай бас билиигэ турар. Үс кыбартыыра олохтоохторо мантан атын олорор дьиэлэрэ суох. Бэлиэтээн эттэххэ, билигин үлэлиир 2025 сылга диэри болдьохтоох хаарбах дьиэттэн көһөрүү бырагыраамата быйылгынан урутаан түмүктэниэхтээх. Онуоха федеральнай бүддьүөттэн 2017 сылтан хаарбаҕынан билиниллибит дьиэлэри көһөрүүгэ эбии үбүлээһини көрдүүр үлэ бара турар.