Степан Аржаков 125 сылынан саҥа кинигэ уонна испэктээк

Сэтинньи 8 күнүгэр Национальнай библиотекаҕа «Степан Максимович Аржаков (1899-1942) Фотографии. Документы» хаартыска альбомун үһүс ситэриллибит кинигэтэ сүрэхтэннэ. Оттон сэтиннньи 9-10 күннэригэр Саха тыйаатырыгар норуодунай суруйааччы Дмитрий Наумов Степан Аржаковка аналлаах «Үйэлэри уҥуордаан» испэктээгэ сүрэхтэниэҕэ.

Хаартыска альбома уонна испэктээк Саха АССР төрүттээччилэртэн биирдэстэрэ, уһулуччулаах судаарыстыбаннай, политическай диэйэтэл Степан Аржаков төрөөбүтэ 125 сылыгар ананаллар.

Степан Аржаков олоҕун, үлэтин-хамнаһын туһунан бастакы хаартыска альбома  2002 сыллаахха бэчээтэммитэ, иккис - 2009 сыллаахха. Саҥа, үһүс кинигэ 800 ахсаанынан тахсыбыт.
Бырабыыталыстыба бэрэссэдээтэлин солбуйааччы Сергей Местников үс кинигэ үһүөн күн сирин көрөллөрүгэр үлэлэспит Национальнай архыып үлэһиттэригэр - кылаабынай археограф Александр Калашниковка, дириэктэри солбуйааччы Наталья Малышеваҕа уонна бэтэрээн Мария Степановаҕа Ил Дархан махтал суруктарын туттарда.
Сергей Местников бэлиэтээбитинэн, Ил Дархан дьаһалынан Степан Аржаков 125 сылынан төрөөбүт улууһугар уонна өрөспүүбүлүкэҕэ бүттүүнүгэр кини аатын үйэтитэр тэрээһиннэр сыл устата ыытылла тураллар. 
Оттон саҥа хаартыска альбомугар Арассыыйа судаарыстыбаннай архыыбыгар, Арассыыйатааҕы судаарыстыбаннай социальнай-политическай история архыыбыгар, Москва куорат киин судаарыстыбаннай архыыбыгар, Саха Өрөспүүбүлүкэтин национальнай архыыбыгар уонна ФСБ, Магадан уобалаһынааҕы ис дьыала управлениеларын архыыптарыгар харалла сытар хаартыскалар уонна докумуоннар киирбиттэр.

Маны сэргэ бу өрөбүллэргэ, сэтинньи 9-10 күннэригэр, Ойуунускай аатынан Саха драмтыйаатырыгар норуодунай суруйааччы Дмитрий Наумов Степан Аржаковка аналлаах «Үйэлэри уҥуордаан» испэктээгэ сүрэхтэниэҕэ. 
Степан Максимович Аржаков сэтинньи 9 күнүгэр (эргэ истиилинэн алтынньы 28 күнүгэр) 1899 сыллаахха Бүлүү куоратыгар төрөөбүтэ. Араас кэмнэргэ Саха АССР наркомун сэбиэтин бэрэссэдээтэлинэн, сири оҥорууга, хааччыйыыга, эргиэҥҥэ, промышленнаска, ис дьыалаҕа наркомунан, Москваҕа национальностар дьыалаларыгар комиссариакка үлэлээн ааспыта, диэн иһитиннэрэр Ил Дархан уонна Бырабыыталыстыба пресс-сулууспата.