Дмитрий Коркин олоҕун туһунан сэдэх ахтыы

«Киин куорат» хаһыат эрэдээксийэтигэр Мэҥэ Хаҥаластан Федот Харитонов хам-түм сонуннарын ыытар үгэстээх. Бу сырыыга бэрт сэдэх, киһи эрэ сэргии ааҕыаҕын суруйан ыыппытын ааҕааччыларбытын кытта үөрүүнэн үллэстэбит.

Александра Сэмэнэбинэ мин 1 кылааска үөрэппит учууталым. Оҕону олус да таптыыр учуутал этэ. Переменаҕа кууһан олорон кэпсэтэрэ. Эчи эдэрин, үчүгэйин, киһи чугаһыан куттанара. Ол биһиги, оччолорго таҥас-сап да мөлтөх оҕолоро буоллахпыт.

Икки-үс сылынан учууталбыт Дмитрий Петрович Коркиҥҥа кэргэн тахсан, интэринээт-оскуолаҕа барбыта. Учууталбытын суохтаан эрэйдэммиппит даҕаны.

Ол айыыта онон олох көрсүбэтэхпит да, кэпсэппэтэхпит да. Апай 5 сыл анараа өттүгэр учууталым төлөпүөнүн нүөмэрин булан, эрийэн, Д.П. Коркин туһунан кини быраата Дмитрий Диринскэй суруйбут кинигэтин ааҕан баран ырытаары, онно чуолкайдаһа, кэпсэтэ киирэ сылдьыбытым.

Чэй иһэ-иһэ кэпсэппиппит. Ону суруйан турабын.
Мин кини тапталлаах үөрэнээччитэ эбитим үһү. Арай учууталым Александра Семеновна ыйытта:
– Төһө сүөһүнү идэһэлэнэн, биһиги Миитэрэйбиниин кыстыыр эбиппит буолуой? – диэн.
– Иккиэйэх бэйэҕит биир идэһэнэн кыстыыр инигит.
– Суох. 7 сүөһү этин туттан кыстыырбыт. Ол интэринээт остолобуойа оччоттон баччаҕа диэри күүстээх ноҕуруускаҕа сылдьар оҕолору тоторбот буоллаҕа. Оҕолор киэһэ биһиэхэ кэлэн эттээх миин, соккуой сиэн эбинэллэрэ. Сойууска, Арассыыйаҕа баран тустар оҕолорго үчүгэй ас наада буоллаҕа. Оччоҕо эрэ кыайар-хотор буоллахтара дии. Бөтүрүөбүс билэр буоллаҕа дии. Аҥаардас эрчиллиинэн оҕо сиппэт. Үчүгэйдик аһыан наада. Онон астарын буһаран баран остуол ортотугар ууран кэбиһэрбит. Ыскааптан иһит-хомуос ылынан, тустуук уолаттар бэйэлэрэ аһыыллара. Кыбыстыахтара диэн биһиги тахсан барарбыт.

Ити курдук учууталым Бөтүрүөбүс биир «кистэлэҥин» кэпсээн турар.