Хаачыстыба – олох ирдэбилэ

Сэтинньи ый иккис чэппиэригэр бэлиэтэнэр аан дойдутааҕы Хаачыстыба күнүнэн сэтинньи 11-17 күннэригэр Дьокуускайга тыа хаһаайыстыбатын тэрилтэлэригэр уонна тустаах үөрэх кыһаларыгар Хаачыстыба нэдиэлэтэ буола турар.

Нэдиэлэ чэрчитинэн Арктикатааҕы судаарыстыбаннай агротехнологическай университекка ыытыллыбыт аһаҕас аан күнүгэр Дьокуускайдааҕы тыа хаһаайыстыбатын техникумун устудьуоннара ыалдьыттаатылар. «Туймаада» агрохолдинг исписэлиистэрэ, СӨ Аһылык технологиятын киинин хаачыстыбаҕа инженерэ Галина Дармаева устудьуоннарга аһылык хаачыстыбатын туһунан кэпсээтилэр. Профессор Константин Степанов кыһын миин иһэр суолтатын билиһиннэрдэ. Старшай преподаватель Кира Иванова ыыппыт маастар-кылааһыгар устудьуоннар борщ уонна рассольник оҥорорго үөрэннилэр. Тэрээһиҥҥэ Хатастааҕы агрооскуола «Собо миинэ», «Отонтон муорус», «Отонтон уонна эриэхэттэн эбииликтэр», «Ис миинэ» бырайыактарын билиһиннэрдэ.
Дьокуускайдааҕы Үүт собуота эмиэ бэйэтин бородууксуйатын көрдөрдө – хат уонна оҕо эмтэрэр дьахталларга аналлаах А, Д3, С битэмииннэринэн байытыллыбыт үүтүн, банан, клубника, малина састааптаах йогуртарын. Маны таһынан Үүт собуотун кылаабынай механига Сергей Перелыгин ХИФУ Физико-тэхиньиичэскэй институтун устудьуоннарыгар собуот сыысхала суох үлэлиирин хааччыйар оборудованиеларын билиһиннэрдэ. 

Аһылык технологиятын киинин исписэлиистэрэ Хаачыстыба нэдиэлэтин чэрчитинэн куорат оскуолаларыгар доруобай аһылыкка сыһыаннаах маастар-кылаастары ыыталлар. Оттон ХИФУ медицинскэй технологияҕа лабароторията Кииҥҥэ бэйэтин маастар-кылааһын ыытта.
Чэппиэргэ, сэтинньи 14 күнүгэр, тыа хаһаайыстыбатын министиэристибэтэ оҥорон таһаарар тэрилтэлэр кыттыылаах төгүрүк остуолу былаанныыр, диэн иһитиннэрэр Ил Дархан уонна Бырабыыталыстыба пресс-сулууспата.