«Сырдык киин куорат» бырагыраама хаамыыта

«Сырдык киин куорат» муниципальнай бырагыраама үбүлээһинэ быйыл 40 мөл. солк. тэҥнэһэр. Ити суумаҕа 208 уот остуолбата уонна 256 лаампа туруохтаах.
Куорат баһылыга Евгений Григорьев иһитиннэрбитинэн, былааннаммыт 17 эбийиэктэн 12-гэр үлэ түмүктэммит.
Ол курдук, «Горсвет» МУТ чопчулуурунан, алтынньы 25 күнүнээҕи туругунан сырдатыы үлэтэ киин куоракка Култуура уонна сынньалаҥ пааркатын киин аллеятыгар, Михаил Николаев аатынан проспектан Михаил Николаев аатынан проспект 2/4 №-дээх дьиэтигэр диэри, «Гимеин» эргиириттэн Мерзлотнай уулуссаҕа диэри түмүктэммит.
Куорат таһынааҕы нэһилиэктэртэн уулусса уота Хатаска Николаев уулуссатыгар, Тулагыга эмиэ Николаев уулуссатын 94 №-дээх дьиэтиттэн 64 №-дээх дьиэтигэр диэри (1 уочарат) холбоммут.
Бу күннэргэ үлэ «Тускул» түөлбэҕэ, Дачная уулуссаҕа уонна Пригороднай сэлиэнньэтигэр бара турар.
«Горсвет» МУТ сыл бүтүөр диэри сырдатыы үлэтин Красильников, Мерзлотнай, Ларионов уулуссаларыгар ситэрэр соруктаах. 
Санатар буоллахха, куорат уулуссаларын сырдатыы «Куттала суох уонна хаачыстыбалаах суоллар» национальнай бырайыагынан эмиэ ыытыллар. Ол курдук, быйыл 973 остуолба уонна 1323 лаампа туруохтааҕыттан 780 остуолба уонна 1069 лаампа нацбырайыак суотугар туруоруллар.
Уопсастыбаннай туоналары тутуу уонна саҥардыы түмүгэр эмиэ куораппыт сыллата сырдаан иһэр. Холобура, быйыл Роман Дмитриев аатынан кытыл, Сайсары кытыла, Кыайыы паарката, култуура уонна сынньалаҥ паарката, Федор Попов аатынан сквер, Ленин болуоссата курдук саҥа эбийиэктэр бары аныгылыы уоттаахтар-күөстээхтэр, диэн иһитиннэрэр Олохтоох дьаһалта пресс-сулууспата.