Сыл саҕаланыаҕыттан 53 киһи уокка былдьанна

Сыл саҕаланыаҕыттан Саха сиригэр 1600 техногеннай баһаар туран, 53 киһи, ол иһигэр 10 оҕо уокка былдьанна, 33 киһи араас кээмэйдээх эчэйиини ылла. Тахсыбыт баһаартан 733-һэ олорор дьиэҕэ буолла, диэн иһитиннэрэр СӨ ЫБММ пресс-сулууспата. 

«ЫБММ исписэлиистэринэн ыытыллар бэрэбиэркэлэр түмүктринэн уот туруутун сүрүн төрүөтүнэн уоттан сэрэхтээх буолуу быраабылатын тутуспат буолуу булолар, ол курдук бу биричиинэнэн турбут 712 баһаар 13 киһи олоҕун илдьэ барда. Иккис миэстэҕэ электричество көмөтүнэн үлэлиир тэриллэри уонна оһоҕу туттуу ирдэбиллэрин кэһии турар», – диэн бэлиэтиир РФ ЫБММ Саха Өрөспүүбүлүкэитигэр управлениетын административнай практикаҕа уонна дознаниеҕа салаатын начаалынньыга Надежда Петрова.
Ааспыт 2023 сыл бу кэрчик кэмин кытта тэҥнии туттахха, баһаар ахсаана 3% эбиллибит, баһаартан өлбүт киһи ахсаана 7% аҕыйаабыт, эчэйиини ылааччы ахсаана – 55% .
Киһи буруйуттан уонна сэрэҕэ суох буолууттан уот турарын тохтотор уонна киһи өлүүтүн таһаарбат сыалтан ЫБММ исписэлиистэрэ баһаартан сэрэхтээх буолуу быраабылаларын тутуһарга ыҥыраллар:
• электропроводка сыысхала суох үлэлиирин ситиһиҥ;
• элбэх прибору холбоон, ноҕоруусканы таһаарымаҥ;
• оҕо электроприборунан оонньуурун таһаарымаҥ;
• дьиэҕэ табахтаамаҥ, ордук арыгы испит туруктаах;
• ититэр тэрили, маһынан оттуллар оһоҕу туруоруу, туттуу быраабылатын кэһимэҥ;
• оттук кэмин устата оһох турбатын ыраастыыр наадатын умнумаҥ;
• уоту умуруорар огнетушитель, уот туран эрэрин сэрэтэр АДПИ установка баарын хааччыныҥ;
• олорор дьиэлэргэ киирэр суоллары бүөлүү тырааныспары туруорумаҥ.
Баһаартан сэрэхтээх буолуу быраабылаларын тутуһуу – дьон олоҕун уонна баайын-дуолун харыстааһын мэктиэтэ. Бэйэҕитин уонна чугас дьоҥҥутун харыстааҥ, диэн иһитиннэрэр ЫБММ пресс-сулууспата.