29.08.2021 | 14:00

Star team: аан дойду бастыҥ кыһалара күүтэллэр

Star team:  аан дойду бастыҥ кыһалара күүтэллэр
Ааптар: Айталина Софронова

«STAR TEAM» бырайыак ааптара Арсен Томскай Саха сирин дьоҕурдаах уонна талааннаах ыччатын кэскилин кэҥэтэр, сайдыылаах үйэ уларыйыыларыгар эрдэттэн бэлэмниир соруктаах, өрөспүүбүлүкэ өркөн өйдөөх, киэҥ билиилээх, кэскиллээх оҕолорун аан дойдуга биллэр үөрэх кыһаларыгар буор босхо үөрэттэрэр сыаллаах өр сыллаах үөрэх бырагырааматын  арыйда.

ӨЙ ҮРДҮКТҮК СЫАНАЛАНЫАҔА

«Куһаҕан, албын мэлдьи өстөөхтөрү үөскэтэр. Үтүө, үлэ, итэҕэл, дьолу-соргуну үрдэтэр уонна  үгүстүк эйиэхэ туһаны аҕалар. Үлэһит уонна дьаныардаах буолуу бигэ материальнай акылааты тэрийэргэ көмөлөһөллөр. Сайдыы, саҥаны билии үрдүк профессионализмҥа тириэрдэр. Тус бэйэҕэр туох да хоруйу кэтэспэккэ, дьолу-соргуну оҥосторго бэлэм буол», – диир Арсен Томскай.

 

ДЬОҔУРДААХ ОҔОЛОРУ ТАЛАБЫТ!

Star Team (Сулус хамаанда) — inDriver сервиһи төрүттээччи Арсен Томскай халыҥ хамаандатын кытта тэрийбит аныгы үйэ балысханыгар сөп түбэһэр, дьаныардаах, дьоҕурдаах оҕолору талан, сүүмэрдээн аан дойду үрдүк үөрэҕин кыһаларыгар киирии ньымаларын бэлэмниир сыаллаах-соруктаах киэҥ далааһыннаах бырайыага. Ол эбэтэр ханнык баҕарар улуус, нэһилиэк, куорат үөрэнээччитэ аан дойду биллэр университетыгар үөрэнэр кыахтаах.

Бырагыраама сүрүн сыала-соруга Саха сирин сайдыытыгар туһуланар. Үөрэнээччилэр бастыҥ үөрэх кыһаларын бүтэрэн, идэлэрин баһылаан бараннар, олорор сирдэриттэн уонна үлэлэриттэн тутулуга суох дойдубут сайдыытыгар, өрө тахсыытыгар үлэлэһиэхтээхтэр, быһаччы эттэххэ, өрөспүүбүлүкэҕэ лиидэр дьон буола үүнүөхтээхтэр.

Бэлиэтээн эттэххэ, 2019 сыллаахха бырагыраамаҕа 10 кыттааччы сүүмэрдээһин бастакы түһүмэҕин ааспыта. Онно Дьокуускай куорат  үөрэнээччилэригэр тургутук ыытыллыбыта. Кыахтаах, өйдөөх оҕолор күрэх бастакы түһүмэҕин ааспыттара.

КЫТААТЫҤ! КЫТТАРГА ДЬУЛУҺУҤ

Билигин, бырагырааманы олоххо киллэрии кэмигэр, үөрэнээччилэргэ үрдүк үөрэх кыһаларын үлэтин-хамнаһын сиһилии өйдөтүү бара турар. Быйыл бырагыраама салҕанан барыа:

— атырдьах ыйа, 2021 сыл — СӨ оскуолаларын тохсус уонна онус кылааһын үөрэнээччилэригэр бырагыраама кыттыылаахтарын эбии сүүмэрдээһинэ ыытыллар;

— 2021-2022 сс. – кыһын араас хабааннаах онлайн маастар-кылаастар ыытыллыахтара. Дьаныардаах үөрэнээччилэр  аан дойду үрдүк үөрэхтэрин кыһаларыгар киирэллэригэр күүстээх эргиири ааһыахтара. Араас хайысха экспертэрэ кыттааччыларга уонна үөрэх тэрилтэлэригэр маннык таһымнаах үөрэххэ киирэргэ бэлэмнэнии тутаах аспектарын туһунан кэпсиэхтэрэ. Эмиэ бу сылга номнуо үөрэххэ киирбит ситиһиилээх устудьуоннар бэйэлэрин уопуттарын, хайдах гынан бэлэмнэниини ааспыттарын туһунан үллэстиэхтэрэ;

— 2022 сыл сайыныгар бырагыраама кыттыылаахтарыттан сэттэ бастыҥ сүүмэрдэнэн тахсыаҕа. Быйылгы 10 кыттааччыттан эмиэ сэттэ киһи талыллыаҕа. Уопсайа 14 финалист bootcamp бэлэмнэниитин, тургутууну ааһыаҕа.

Boot Camp — Windows бырагырааманы Apple хампаанньа MacBook көмпүүтэригэр туруоруохтара. Boot Camp диискэҕэ эбии раздел оҥорорго көмөлөһөр.

Уопуттаах экспертэр бэлэмнэнии кэнниттэн аан дойду ТОП-50 университетыгар киирэргэ сайабылыанньа биэрэргэ көмөлөһүөхтэрэ. Холобура: Гарвард, Йель, Сорбонна, Оксфорд, Стэнфорд, Кембридж, о.д.а. аан дойду тарбахха баттанар университеттарыгар өрөспүүбүлүкэбит хайа баҕарар муннугуттан үөрэнэр оҕо билиини сомсор кыахтаах. Маны сэргэ, «Синет Спарк» үрдүк үөрэх кыһаларыгар киирбит оҕолорго толору төлөбүрдээх граннары биэриэҕэ. Чопчулаан биэрдэххэ, маннык курдук таһымнаах үрдүк үөрэх кыһаларыгар үөрэнии сылга 100 тыһыынча дуолларга тиийэр, Арассыыйа валютатынан 7 339 200 солк. тэҥнэһэр. Бу хас биирдии ыалга олус улахан суума. Этэргэ дылы, киһи өйүгэр баппат сыыппарата. Инньэ гынан, сылга 15-20 устудьуон үөрэҕин төлүүргэ «Синет Спарк» биир сылга олус улахан кээмэйдээх грант пуондатын тэрийиэхтээх. Кэлэр өттүгэр «Синет Спарк» төрүттээччитэ Арсен Томскай чааһынай эндемическэй пуонда тэрийэн, элбэх сыл устата талааннаах оҕолору үөрэттэрэргэ тоҕоостоох, тус сыаллаах Star Team бырагыраама нөҥүө хас эмэ сыл устата Саха сирин оҕолорун үөрэттэрэр, аан дойдуга биллэр дьон оҥортуур баҕа санаалаах.

АРСЕН ТОМСКАЙ ЭЙИГИН ЫҤЫРАР

Онон кыттааччыларга Арсен Томскай салалталаах хамаанда сүүмэрдээһин биллэрэр. Бырагыраамаҕа кыттыан баҕалаахтар. 2021 сыл балаҕан ыйын 7 күнүгэр диэри анкетаны https://docs.google.com/forms/d/1WYtGo6sFjePNGTsB4W93v4K3gxrZFG4Bf1bcePS2o7U/viewform?edit_requested=true толоруохтааххыт:

үөрэнээччи толору аата-суола;

олорор сирэ (куорат, бөһүөлэк, сэлиэнньэ). Кыттааччы хайаан да Саха сиригэр үөрэнэр буолуохтаах;

оскуолата, кылааһа;

төрөппүт төлөпүөнүн нүөмэрэ, e-mail почтатын аадырыһа;

оскуола 2019/22 сыллааҕы сыанатын таабылын куоппуйата;

оскуола дириэктэриттэн эбэтэр завучтан мэктиэ сурук. Ол оскуола бэйэтин былааҥкатыгар оҥоһуллар.

Маны таһынан сурукка үөрэнээччи олимпиадаҕа, уопсастыбаннай тэрээһиннэргэ, спорка ситиһиилэрин ыйар булгуччулаах.

Талыллыбыт кыттыылаахтар испииһэктэрэ балаҕан ыйын 10 күнүгэр диэри бигэргэтиллиэҕэ. Ыҥырыллыбыт экспертэр уонна бастайааннай маастар-кылаастар өҥөлөрө барыта «Синет Спарк» иһинэн төлөнөр, оскуола үөрэнээччилэригэр уонна кинилэр дьиэ кэргэттэригэр маастар-кылаастар босхо.

ҮҮНЭРГЭ-САЙДАРГА КЫАХ БИЭРЭР

Данил Боярскай, Дьокуускай куорат национальнай гимназиятын 9 кылааһын үөрэнээччитэ:

Араас таһымнаах олимпиадаларга сотору-сотору кыттар буолан, бириистээх миэстэҕэ элбэхтэ тиксибитим эбэтэр кыайыылааҕынан тахсыбытым. Саахыматынан, баскетболунан уонна видео оонньууларынан үлүһүйэбин. Инникитин инженер-программист буолуохпун баҕарабын, тоҕо диэтэххэ, бу идэ наадалаах. Star Team бырайыак миэхэ университекка үөрэнэр кэммэр элбэх билиини-көрүүнү, уопуту биэриэ дии саныыбын.

Алина Бускарова, Физико-техническэй лицей 9 кылааһын үөрэнээччитэ:

Мин экономикаҕа уонна математикаҕа муниципальнай олимпиадалар призера буолабын, ону сэргэ Бүтүн Арассыыйатааҕы турнир дипломанабын. Араас куруһуоктарга сырыттым, билигин математиканан, экономиканан уонна өйү сайыннарар оонньууларынан дьарыктанабын. Көҥүл кэмҥэ уруһуйдуурбун, иистэнэрбин сөбүлүүбүн. Инникитин бэйэм бизнес эйгэтин баһылыахпын баҕарабын. Ол иһин бастыҥ уһуйааччылары уонна үөрэнээччилэри кытта бастыҥ университеттарга киирэргэ бэлэмниир кыаҕы таларга быһаарынным.

Исидор Сивцев, «Айыы Кыһата» национальнай гимназия 9 кылааһын үөрэнээччитэ:

Оскуола предметтэриттэн химияны, биологияны ордоробун. Быйыл «Первая орбиталь» химияҕа өрөспүүбүлүкэтээҕи олимпиадаҕа бириистээх миэстэҕэ тиксибитим уонна Дьоҕус наука академиятыгар дистанционнай үөрэххэ ыҥырыы туппутум.

Биологияттан анатомияны сэргиибин. Киһи киһини көмүскүөхтээх, эмтиэхтээх диэн санаа миэхэ мэлдьи улахан интэриэһи үөскэтэр.

Саха сылгытыттан саҕалаан, Green Book атыы-эргиэн балаһааккатын оҥорууга тиийэ элбэҕи чинчийдим.

2015 с. «Аллайыаха ааҕыылара» НПК кыайыылааҕа буолбутум, куораттааҕы «Хомоҕой тыл» күрэххэ бастакы миэстэни, «Аман өс» күрэххэ иккис миэстэни ылбытым.

Спордунан дьаныардаахтык дьарыктанабын: хамаанданан волейболунан, хапсаҕайынан уонна спорт национальнай көрүҥнэринэн. Кэккэ ситиһиилэрдээхпин.

Инники олохпун быраас идэтин кытта ситимниир баҕалаахпын.  Мин ыра санаам – киһи этин-сиинин иккистээн тилиннэрии. Эбэтэр киһи аймах онно чугаһыыр буоларыгар. Ити сыалбын ситиһэрбэр, дьон-сэргэ олоҕо тупсарыгар, сайдыы суолун кэҥэтэрбэр Star Team олус улахан кыаҕы биэриэҕэ.

Сонуннар

Ордук ааҕаллар

Педиатр Елена ИВАНОВА:  «Улаатар оҕоҕо — ураты болҕомто»
Дьон | 21.09.2021 | 12:00
Педиатр Елена ИВАНОВА: «Улаатар оҕоҕо — ураты болҕомто»
Бүгүн “Яннамед” медицинскэй клиника педиатр бырааһа Елена Владимировна Иванова ыалдьыттыыр. Кинини кытта оҕо доруобуйатын туһунан кэпсэтиибитин сэргээн ааҕыҥ.   Быраас анала – Кыра оҕо туга ыалдьарын сатаан кэпсээбэт, уопсайынан, кырачаан дьону кытта үлэлиир ыарахан. Педиатрияны тоҕо талбыккыный? Үлэҥ уратытын туһунан кэпсиигин? –  Мин оҕолору кытта үлэлиэм диэн эрдэттэн быһаарыммытым. Эдьиийим...
Баһаарга үлэлээбит волонтердар доруобуйаларын бэрэбиэркэлии медиктэр кэллилэр
Сонуннар | 14.09.2021 | 16:50
Баһаарга үлэлээбит волонтердар доруобуйаларын бэрэбиэркэлии медиктэр кэллилэр
Балаҕан ыйын 14 күнүгэр Дьокуускайга Федеральнай медико-биологическай агентство биригээдэтэ кэллэ. Медиктэр баһаары умуруорууга кыттыбыт волонтердар доруобуйаларын туругун көрүөхтэрэ. Федеральнай Сибиирдээҕи научнай-клиническэй киин генеральнай дириэктэрэ Борис Баранкин СӨ премьера Андрей Тарасенколыын көрүстэ. СӨ доруобуйа харыстабылыгар Министиэристибэтэ иһитиннэрбитинэн, сэрэтэр хайысхалаах медицинскэй көрүү испииһэгэр өрөспүүбүлүкэ 500-тэн тахса олохтооҕо киирбит.  Бу иннинэ өрөспүүбүлүкэ бырабыыталыстыбата...
Дьокуускайга үөрэҕирии үлэһиттэрин балаҕан ыйынааҕы мунньахтара ыытыллар
Сонуннар | 15.09.2021 | 18:00
Дьокуускайга үөрэҕирии үлэһиттэрин балаҕан ыйынааҕы мунньахтара ыытыллар
Балаҕан ыйын 14 күнүттэн Дьокуускайга «Актуальные вопросы достижения стратегической цели повышение качества образования» диэн тиэмэнэн үөрэҕирии үлэһиттэрин балаҕан ыйынааҕы мунньахтара ыытыллар. Ол туһунан Уокуруктааҕы дьаһалта пресс-сулууспата иһитиннэрдэ.  Быйылгы мунньах дьүүллэһиитигэр Дьокуускай куоракка үөрэҕирии хаачыстыбатын үрдэтэр сыаллаах түөрт хайысха көрүллэр: иитии уонна эбии үөрэхтээһин боппуруостара; муниципальнай уонна  үөрэҕирии тэрилтэтин таһымнарыгар үөрэҕирии...
Гаас ситимнэригэр саҥа быраабыланан холбуохтара
Сонуннар | 17.09.2021 | 14:00
Гаас ситимнэригэр саҥа быраабыланан холбуохтара
Социальнай газификация уратыларын учуоттаан, Арассыыйаҕа гаас ситимнэригэр холбонорго саҥа быраабылалар олоххо киирэллэр. Ити уонна да атын кэккэ докумуоннары, бэрэсидьиэн көҕүлээбит бырагыраамаларын олоххо киллэрэр курдук,  бырабыыталыстыба бэрэссэдээтэлэ Михаил Мишустин бигэргэппит.  Быраабылаҕа этиллибитинэн, гааһы тарҕатар инфраструктура баар эрэ нэһилиэнньэлээх пууннарыгар гаас киириэн сөп уонна уонна дьиэ кэргэн тус сыалларыгар эрэ холбонор. Кэмиэрсиэйэ...