Спорт сонуннара
Арассыыйа Судаарыстыбаннай Дууматыгар дойдуга 2023-2025 сылларга физическэй култуураҕа уонна спорка үбүлээһини үрдэтэр туһунан быһаарыыны ыллылар.
Ол эбэтэр физкультураҕа уонна спорка элбэх үп көрүллүөҕэ. Бу ааһан эрэр 2022 сылы кытта тэҥнээтэххэ, 2023 сылга – 2,5 млрд солк., 2024 сылга – 2,2 млрд солк. Онон 2024 сылга “Азия оҕолоро” спортивнай оонньуулары ыытарга бэлэмнэнэр дойдуга спортивнай регионунан биллэр Сахабыт сиригэр көмө, өйөбүл баар буоларыгар эрэниэххэ сөп.
«Антрацит» саҥа каток
Таас чохтоох Нерюнгри оройуонун Чульман бөһүөлэгэр хаҥкылыыр катоктаах аарыма физкультурнай-чэбдигирдэр комплекс үлэҕэ киирдэ. Саха Өрөспүүбүлүкэтин Ил Дархана Айсен Николаев, Нерюнгри оройуонун баһылыга Роман Щегельняк, “Газпромтан” Николай Кузьмичев каток үөрүүлээхтик аһыллыытын түгэнигэр эҕэрдэлэрин тиэртилэр. Саҥа катокка “Антрацит” диэн күүһү-уоҕу, эрчими биэрэр таас чох аатын иҥэрдилэр. Бары өттүнэн ирдэбиллэргэ толору эппиэттиир аныгы оҥоһуулаах эбийиэккэ хоккейынан, фигурнай хаҥкынан, шорт-трегинэн дьарыктанарга бэртээхэй усулуобуйа баар буолла.
Кэскиллээх сөбүлэһии
Дойдуга мас тардыһыы спордун көрүҥэ кэскиллээхтик сайдарыгар өссө биир боччумнаах хардыы оҥоһулунна.
Ол курдук, Санкт-Петербурга буолан ааспыт мас тардыһыытыгар Бүтүн Арассыыйатааҕы күрэхтэһии кэмигэр “Мас тардыһыытыгар устудьуоннар лигаларын” тэрийэргэ М.К. Аммосов аатынан ХИФУ ректора Анатолий Николаев, Бүтүн Арассыыйатааҕы мас тардыһыытын федерациятын бэрэсидьиэнэ Михаил Гуляев уонна Арассыыйа устудьуоннарын спортивнай сойууһун вице-бэрэсидьиэнэ Роман Ольховскай бииргэ үлэлэһэр туһунан сөбүлэһиигэ илии баттастылар.
Бастыҥнары быһаардылар
Дьокуускайга “Чолбон” бассейҥҥа 9-15 үөһэ саастаах оҕолор харбааһыҥҥа күрэхтэстилэр.
Өрөспүүбүлүкэ турнира сүрүн тренеринэн үлэлии сылдьыбыт Юрий Иванович Усов кэриэһигэр ананан, ахсыс төгүлүн ыытылынна. Мииринэйтэн, Нерюнгриттан, Усть Нераттан, Дьокуускайга баар “Самородок”, “Долгун” уонна Жатай бассейннарыгар дьарыктанар 200-тэн тахса спортсмен оҕо кытынна.
Бастыҥ көрдөрүүлэри спорт маастардара Антон Тищенко, Владислав Адасько, Алексей Лапшин ситистилэр. Кинилэри Арассыыйа чемпионатын бассейннарын долгуннара күүтэллэр.
Сонуннар
Ордук ааҕаллар
