Сордоох тохтобул

"Киин куорат" хаһыат быйыл кыһын сири кытта сир буолбут ыскамыайкалаах, хаара ыраастаммакка халыҥ чигди буолбут Гагаринскай уокурукка баар “Можайскай” оптуобус тохтобулун хаартыскатын таһаарбытын куйаар ситимэ киэҥник тарҕаппыта. Ол  кэннэ хаарын ыраастаабыта буолбуттара. Арай "Норуот фронун" биир бэрэстэбиитэлэ ыскамыайка оҕолорго аналлаах, ол иһин кылгас атахтаах диэн видео устан ыыппыттааҕа. Чахчыта даҕаны, дьокутаакка хандьыдааттар саатар бу тохтобулга оҕолорго аналлаах ыскамыайкалары оҥортороллоро буоллар, кырдьык, норуот өйөбүлүн ылыа эбиттэр. Чуолаан бу тохтобул аттыгар икки уһуйаан, биир оскуола бааллар. Хомойуох иһин, оҕо аймахха, кырдьаҕас дьоҥҥо аналлаах кылгас атахтаах ыскамыайкалаах тохтобул биһиги куораппытыгар ханна да суох эбээт!
Эрэллээх ааҕааччыбыт "сордоох тохтобул" бүгүҥҥү туругун түһэрэн ыытар. Көрөр курдук, тимир дьардьама кур бэйэтэ кубулуйбакка, саатар кырыыһата суох турар. Хаарбыт ууллан, сайын ааһан, саҥа хаар түһэрэ чугаһаата.