Социальнай тэрилтэлэргэ — ураты болҕомто

Муус устар 18 күнүнээҕи туругунан куорат баһылыгын хаһаайыстыба боппуруостарыгар солбуйааччы Егор Кардашевскай олох-дьаһах хомунаалынай хаһаайыстыбатын кыһалҕаларыгар нэдиэлэтээҕи үлэни былаанныыр мунньаҕы ыытта.

Сүрүн болҕомто хаар уутун оборторууга уурулунна. Ол курдук, нэдиэлэ саҥатын көрдөрүүтүнэн  «Жилкомсервис» МУП уонна бэдэрээттээх тэрилтэлэр куорат уулуссаларыттан 2 576 куб/м иэннээх ууну оборторон тиэйбиттэр. Маныаха күҥҥэ 20 тиийэ массыына үлэлиир, диэн «Жилкомсервис» саҥа салайааччыта Юрий Спиридонов иһитиннэрбит.

Управалар салайааччылара эмиэ отчуоттаатылар. Ол курдук, куорат 8 управатыгар 14 ассенизаторскай массыына, 20 мотопомпа уонна 6 носуос үлэлии турара этилиннэ. Оттон Салайар хампаанньалар 111 мотопомпалаахтар уонна 78 носуостаахтар.

Өҥөнөн хааччыйар тэрилтэлэр иһитиннэриилэринэн, үлэ былаан быһыытынан бара турар, саахал тахсыбатах.

Егор Кардашевскай управалар салайааччыларыгар эппиэттээх уокуруктарын кэрийэн ордук уустук балаһыанньалаах учаастактары быһаарарга уонна кытаанах хонтуруолга тутарга сорудахтаата. Ол иһигэр сүрүн болҕомто социальнай тэрилтэлэргэ уураллара наадатын эттэ.

Бэлиэтээн эттэххэ, кулун тутар 28 күнүттэн муус устар 17 күнүгэр диэри «Жилкомсервис» МУП күүһүнэн 2 562 куб/м уу оборторуллубут, аҥаардас муус устар 17 күнүгэр – 952 куб/м уу.