SMART-библиотека: Үтүө эрэ сонуннар

Дьокуускай куораттааҕы SMART-библиотека бу күннэргэ бииртэн биир үөрүүлээх сонуннарынан баай. Ол курдук, Санкт-Петербург куораттан Гран-при үрдүк аатын аҕаллылар уонна бэйэлэригэр «Тайный коридор» диэн саҥа миэстэни оҥостон эрэллэр. 
«Тайный коридор» диэн анал оонньуулары ыытар, хаартыскаҕа түһэр миэстэ библиотека нуул этээһигэр кинигэни харайар подвал таһыгар тэриллэн эрэр. «Кистэлэҥ» хос ыам ыйын 26 күнүгэр «Библионочь» Бүтүн Арассыыйатааҕы аахсыйаҕа бэлэм буолуохтаах. Онон библиотека уруһуйдуур волонтердары ыҥырар (билсэр төл.:+7 999 244-77-35 Ксения).
Иккис үөрүүлээх сонун: SMART-библиотека «Күн оҕолоро» тыйаатыр устуудьута Санкт-Петербург куоракка буолан ааспыт «Призвание – артист!» аан дойдутааҕы бэстибээлтэн «Кындыкаан» испэктээкилинэн Гран-При бириэмийэни аҕалла. Библиотека Н.Д. Неустроев аатынан «Мельпомена» диэн кинигэ тыйаатырын режиссера Саргылаана Горохова уонна «Күн оҕолоро» тыйаатыр устуудьуйатын уһуйуллааччылара  дипломнарынан уонна 15 тыһыынча солкуобай кээмэйдээх сертификатынан наҕараадаламмыттар.