Сэрэхтээх буолуҥ!

Киин куорат олохтоохторо массыанньыктар угаайыларыгар киирэллэрин тохтоппоттор. Ол курдук, ааспыт нэдиэлэҕэ биэнсийэлээх, консьерж, промышленнай хампаанньа, доруобуйа харыстабылын тэрилтэлэрин үлэһиттэрэ массыанньыктарга 1 мөлүйүөн 800 тыһыынча солкуобайы ууран биэрбиттэр.

Массыанньыктар 86 саастаах биэнсийэлээх эмээхсиҥҥэ баан үлэһитэбин диэн эрийэн, кини аатынан кирэдьиит ылаары оҥостоллор диэн биллэрбиттэр. Онуоха кырдьаҕаһы уурунуутун барытын «куттала суох» каартаҕа көһөргө итэҕэппиттэр. Эмээхсин барахсан харчытын сыыһын сонно тута кинилэр эппит каарталарыгар ыытан баран угаайыга киирбитин дьэ өйдөөбүт.

Консьерж дьахтар интэриниэккэ үгүөрү хамнастаах үлэ туһунан биллэриигэ кэтиллэ түспүт. Хараҕа умайан, онно баар анкетаны толорбут уонна төлөпүөнүн нүөмэрин хаалларбыт. Сотору буолаат эр киһи эрийэн, хамнас аахсарга баан счетугар харчы угар наадатын эппит. Дохуот оннук эрэ түгэҥҥэ киириэхтээх диэн итэҕэппит. Дьахтар албын-көлдьүн дьоҥҥо киирэн биэрбитин «үлүннэрбит» харчытын саҥа счетугар ыытара сатамматаҕар дьэ өйдөөбүт.

Массыанньыктар угаайыларыгар саастаах дуу, үөрэҕэ суох дуу дьон эрэ түбэһэр дии саныыр сыыһа. Бөдөҥ промышленнай тэрилтэ үлэһитэ 26 саастаах эр киһи интим өҥөтүнэн туһанарга сананан, интэриниэттэн онуоха сөптөөх биллэриилэри сыымайдаабыт. Биир нүөмэргэ эрийэн көрбүтэ, ким даҕаны хоруйдаабатах. Арай, соһуйуон иһин, сотору бэйэлэрэ эрийбиттэр уонна харчы төлүүргэ модьуйбуттар. Үлэҕэр, дьоҥҥор эҥин биллэриэхпит диэтэхтэрэ дуу, эдэр киһи түмүгэр 172 тыһыынчатыттан ытыс соттубут.

Доруобуйа харыстабылын тэрилтэтин үлэһитэ эдэр дьахтар эмиэ «баан үлэһитэбин” диир дьоҥҥо албыннаппыт.

Ытыктабыллаах биир дойдулаахтарбыт! Ханнык да түгэҥҥэ итинник эрийэр дьон угаайытыгар киирэн биэримэҥ, баан каарталаах буоллаххытына, төлөпүөнү ууран баран бааҥҥа бэйэҕит эрийэн билсиҥ эбэтэр полицияҕа тыллааҥ, диэн ИДьМ Дьокуускай куораттааҕы управлениетын пресс-сулууспата иһитиннэрэр.