«Саюри» тыа хаһаайыстыбатын исписэлиистэрин бэлэмнэһиэҕэ

Икки тэрилтэ бииргэ үлэлээһинэ, устудьуоннар үөрэхтэрин бүтэрдэхтэринэ, «Саюрига» үлэҕэ киирэр кыахтаналларын мэктиэлиир.

«Саарбаҕа суох, кыттыгас бырагыраамалар устудьуоннарга, оҥорон таһаарааччыларга уонна үөрэх тэрилтэлэригэр улахан көдьүүстээхтэр, сэбиэскэй систиэмэттэн үчүгэй өрүттэрин ылан, эдэр исписэлиистэри үлэнэн хааччыйар кыаҕы биэрэллэр. Устудьуоннарбыт үөрэҕирии бырагыраамаларын баҕаран туран баһылыахтара, билиилэрин быраактыкаҕа туһаныахтара, үлэни уонна үөрэҕи тэҥҥэ дьүөрэлиэхтэрэ», — диэн санаатын үллэстэр Тыа хаһаайыстыбатын техникумун дириэктэрэ Андрей Самсонов.

Бырагырааманан «Саюри» ХЭТ бастакынан кэлбиттэртэн биирдэстэрэ – иккис куурус устудьуона Валентина Караваева. Кини агроном-чинчийээччи идэтин баһылыыр.  

«Техникум салалтата төлөбүрдээх быраактыка туһунан этии киллэрбитигэр тута сөбүлэспитим. Онно эбии, агрокомплекска инники өттүгэр штаттаах үлэһит быһыытынан киириэххэ сөп. «Саюрига» уһуйуу үрдүк таһымнааҕын көрдүм, улахан кэлэктиипкэ киирэн үлэлииргэ наһаа көмлөһөр. Үөрэхпин бүтэрдэхпинэ манна үлэлиир былааннаахпын», — диэн кэпсээтэ устудьуон.

«Саюри» ХЭТ уонна Дьокуускайдааҕы Тыа хаһаайыстыбатын техникума үс өрүттээх дуогабары эдэр исписэлиистэри үлэнэн хааччыйыы тус бырагырааматын сайыннарыы саҥа саҕалааһынын быһыытынан көрөллөр. ХЭТ салалтата маннык хайысхалаах үрдүк үөрэх кыһалара, училищелар, техникумнар эмиэ кинилэри кытта үлэлэһэллэрин күүтэр. Манна даҕатан эттэххэ, «Саюри» үөрэниэн, билиилэрин хаҥаттыан баҕарар үлэһиттэрин өйүүр, үөрэхтэрин бэйэтэ төлүүр.