«Саюри» былаанын 16 бырыһыанынан куоһарбыт

2023 сылга «Саюри» агрокомплекс бырайыактаммыт кыаҕыгар тахсар. Ол курдук, сыл бастакы үс ыйыгар тэпилииссэ номнуо 704 туонна сибиэһэй оҕуруот аһын ылан, былаанын 16,3%-нан куоһарбыт.

«Горснаб» МУТ дириэктэрэ Петр Абрамов иһитиннэрэринэн, ааспыт кыһын төһө даҕаны ураты тымныы буоллар, комплекс тохтоло суох үлэлээбит. Бу саас агрономнар «Лоэнгрин» диэн оҕурсу саҥа суордун үөрэтэллэр, бу оҕурсу «Мева» ийэ суортан кыратык уһун уонна атын амтаннаах дииллэр.

Хаһаайыстыба болҕомтотун уурар биир хайысхата – агрокомплекс бородууксуйатын оннугар кэлии оҕуруот аһын атыылааһыны утары үлэ. 
Биллэрин курдук, бүгүҥҥү күҥҥэ «Саюри» бородууксуйатын куорат 150 маҕаһыыныгар атыылаһыахха сөп, ол иһигэр «Токко», «Мясной двор», «О-город», «Ферма», «Ганза», «Скиф», «Блюз» о.д.а. маҕаһыыннарга.