Сайсары уокуругар тутуллар спорт комплексын Айсен Николаев уонна Евгений Григорьев билистилэр

Киин куорат Ильменскай уул., 27 элбэх функциялаах, гимнастикалыыр саалалаах спорт киинин тутуу күргүөмнээхтик бара турар. Саҥа эбийиэк 2 800 кв.м иэннээх.

Кулун тутар 16 күнүгэр Ил Дархан Айсен Николаев уонна куорат баһылыга Евгений Григорьев быйыл сайын «Азия оҕолоро» оонньууларга бэлэм буолуохтаах эбийиэги тутуу хаамыытын билистилэр.
«Бүгүҥҥү күҥҥэ тутуу 80% бэлэм, ыам ыйын ортотун эргин үлэҕэ киириэҕэ. Бу күннэргэ инженернэй ситимнэри тардыы ыытыллар. Халлаан сылыйдаҕына, аспаал ууруллуоҕа. Бу спорт комплексыгар бастакы этээскэ биһиэхэ соҕотох анал гимнастика саалата баар буолуоҕа, дьиэ 13 м тиийэ үрдүктээх. Иккис этээскэ единоборстволарынан, боксанан дьарыктанар хостор, тренажернай саала оҥоһуллуохтара», - диэн быһаарар Евгений Григорьев. 

Тутууга эппиэттээх «Монтажник» ПК бэрэссэдээтэлин солбуйааччы Александр Ханин иһитиннэрбитинэн, муус устар эргэтигэр - ыам ыйын саҥатыгар тиэргэни тупсарыы, аспааллааһын, киирэр суога бетон кутуута ыытыллыаҕа.

Сайсары уокуругар бастакы элбэх функциялаах спорт киинэ «Демография» нацбырайыак «Спорт – норма жизни» федеральнай бырайыагынан тутуллар.