Сайсары уокуругар икки дьиэ тиэргэнэ оҥоһуллар

Сайсары уокуругар бу сайын Чайковскай уул., 30/1 уонна 30/2 элбэх этээстээх дьиэлэрин тиэргэннэригэр тупсарыы үлэтэ ыытыллар. 
Уокурук управатын салайааччыта Владимир Слепцов үөрүүлээх сонуну Дьиэ кэргэн, таптал уонна эрэл күнүнэн ыытыллыбыт Тиэргэн бырааһынньыгар мустубут дьоҥҥо иһитиннэрдэ итиэннэ түгэнинэн туһанан оҥоһуллуохтаах тиэргэннэр дизайн-бырайыактарын оҥорууга көхтөөх кыттыыны ылбыттарга махтанна. Владимир Слепцов маны сэргэ уокурук сайдыытыгар кылаатын иһин Кеша Алексеев уул., 12/2 икки этээстээх мас дьиэтин старостата Нэлля Васильевна Сугонякинаҕа куорат баһылыга Евгений Григорьев Махтал суругун туттарда.
Бырааһынньыкка мустубут оҕолору 25 №-дээх оскуола дириэктэрэ Иван Захаров эҕэрдэлээтэ, оттон 18 №-дээх оскуола баһаатайдара араас бириистээх оонньуулары тэрийдилэр.