Савва Михайлов аатынан «Дьоруой паарата» Дьокуускай куорат 33 №-дээх оскуолатыгар арылынна

Олунньу 22 күнүгэр Дьокуускай куораттааҕы Л.А. Колосова аатынан 33-дээх оскуола үөрэнээччилэрин төрөппүт аҕалара, Саха сиригэр биллиилээх уопсастыбаннай диэйэтэл, баҕа өттүнэн анал байыаннай дьайыыга баран олоҕун толук уурбут Савва Анатольевич Михайловка аналлаах «Дьоруой паартата» арылынна.
Долгутуулаах тэрээһиҥҥэ Ил Түмэн бэрэссэдээтэлин солбуйааччы, Байыаннай сулууспалаахтар, байыаннай дьайыылар бэтэрээннэрин дьыалаларыгар, патриотическай иитии уонна уопсастыбаннай тэрилтэлэр боппуруостарыгар кэмитиэт салайааччыта Александр Подголов, Дьокуускай куорат бэтэрээннэрин сэбиэтин бэрэссэдээтэлэ Николай Тряпша, СӨ Нэһилиэнньэ дьарыктаах буолуутугар судаарыстыбаннай кэмитиэтин сүрүн исписэлииһэ Иванна Новогодина, уопсастыбанньык Гулжан Огонерова, СӨ Култуурунай нэһилиэстибэ эбийиэктэрин харыстабылыгар департаменын салайааччытын солбуйааччы Гаврил Терентьев, Губинскай уокурук управатын салайааччыта Валентин Романов ыалдьыттаатылар, Савва Михайлов туһунан ахтан-санаан аастылар.
Дьоруой кэргэнэ Валерия Александровна Михайловтар дьиэ кэргэттэригэр умнуллубат суолталаах бырайыагы олоххо киллэрсибит дьоҥҥо барыларыгар махталын биллэрдэ. Оттон Дьоруой паартатыгар бастакынан олорор чиэс Савва Михайлов уолаттарыгар - Л.А. Колосова аатынан 33 №-дээх оскуола үөрэнээччилэрэ Владилен уонна Всеволод Михайловтарга тигистэ.
Дьоруой хаартыскалаах, олоҕун суолун, үлэтин-хамнаһын билиһиннэрэр суруктаах паартаҕа кэнэҕэһин уопсастыбаннай үлэҕэ, спорка, айар үлэҕэ көхтөөхтүк кыттар оҕолор, үөрэх туйгуннара олоруохтара.