Сахаттан бастакы профессионал-боксер

Ньурба Хорулатыттан төрүттээх-уустаах, кикбоксиҥҥа Европа икки, аан дойду икки төгүллээх чөмпүйүөнэ, РФ спордун үтүөлээх маастара Василий Васильевич Васильев төрөппүт уола Петр Васильев аҕатын “туйаҕын хатаран”, соторутааҕыта Москваҕа  циркэ уораҕайыгар буолан ааспыт профессионал боксердар “Wild Boxing” турнирдарыгар күүстээх утарсааччытын профессиональнай боксаҕа 25-тэ киирсибит улахан титуллаах боксер Павел Маликовы маҥнайгы рауҥҥа иккитэ нокдаун уонна бүтэһигэр нокаут ыыталаан итэҕэтиилээхтик хотто.

Кыайыы көтөллөөх Дьокуускайга кэлээтин кытта, сахаттан бастакы уонна соҕотох профессионал-боксерга аналлаах  пресс-конференцияҕа Петр Васильевы кытта спорт салайааччылара – Саха Өрөспүүбүлүкэтин спорка миниистирэ Леонид Спиридонов, Дьокуускай куорат физическэй култуураҕа уонна спорка управлениетын начальнига Эдуард Ефимов итиэннэ суруналыыстар көрүстүлэр. Пресс-конференцияҕа боксер төрөппүт аҕата, Арассыыйа спордун үтүөлээх маастара Василий Васильевич Васильев эмиэ кытынна.

Спорт миниистирэ Леонид Спиридонов  Петр Васильевка Махтал сурук уонна саха быһаҕын туттарда.

Тустуу көбүөрүттэн – рингэҕэ

Петя оҕо сылдьан биллиилээх бөҕөс, тренер Василий  Егорович Стручковка тустуунан дьарыктанан баран боксаҕа көһөн, аҕатын көрүүтүгэр-истиитигэр киирбит. Үтүөлээх тренердэргэ Михаил Георгиевич Вальга, Артур Иннокентьевич Пахомовка эрчиллибитэ.

Спорка дьоҕурдаах уолга ситиһиилэр өр кэтэһиннэрбэтэхтэрэ. Оҕолорго Арассыыйа чемпионунан буолары ситиспитэ. Амурдааҕы физкультура институтугар үөрэнэр сылларыгар тренер Сергей Иванович Гандургаевка боксанан салгыы дьарыктаммыта. Любительскай боксаҕа Уһук Илиҥҥэ сэттэтэ чөмпүйүөннээбитэ. Саха Өрөспүүбүлүкэтин уонна Аммаҕа Саха сирин норуоттарын спортивнай оонньууларын чөмпүйүөнэ. “А” кылаастаах Коротков норуоттар икки ардыларынааҕы улахан турниры үстэ кыайда. Испанияҕа иккис буолбута. Боксаҕа норуоттар икки ардыларынааҕы кылаастаах спорт маастарын икки төгүл толорору ситистэ. Киниэхэ хотторбут казах уола Олимпийскай оонньууларга үһүс миэстэни ылбыта да Петр Васильев үчүгэй боксер буоларын итэҕэтэр.

Оҕо эрдэҕиттэн профессионал-боксер буолар баҕа санаалаах буолан, 2019 с. профессионаллар рингэлэригэр көспүтэ. Гонорара үчүгэй. Уон рауннаах киирсиигэ Турция рингэтигэр аан маҥнайгытын тахсыбыта уонна Фарух диэн утарсааччытыгар үһүс рауҥҥа суоһарыылаах охсууну оҥорбутугар күөн  көрсүһүүнү эрдэ тохтоппуттара. Таилаҥҥа “Хоруол Кубогын”, Соҕуруу Кореяҕа, Хотугу Кореяҕа, Казахстаҥҥа, Албанияҕа, Турцияҕа буолуталаабыт турнирдары кыайталаабыта. Ломаченко, Хейни курдук аатырбыт профессионаллартан холобур ылар. Рингэҕэ ыраатар, үүнэр-сайдар туһугар анаан-минээн омук тылын үөрэтэр. 

Профессиональнай бокс рингэтигэр алтата тахсан барыларыгар дьоһуннук кииристэ. Бокс эйгэтигэр нокаутерунан биллэр. Балаҕан ыйыгар Москваҕа аан дойдуга биллэр бэһис таһымнаах уонна рейтиннээх турниры кыайан, Петр Васильев Москваҕа баар “Bupas Gym” диэн профессионаллар кулууптарыгар киирдэ. Үөрүүнү кытта ытыстарын үрдүгэр түһэрэн ыллылар. Онон титуллары  ылар туһугар салгыы өссө күүскэ дьарыктанарыгар улахан кыахтар баар буоллулар. 

Тренердэр ирдэбиллэрэ кытаанах

Петр мантан ыла профессиональнай бокс эйгэтигэр улаханнык билиниллэр уонна ытыктанар, профессиональнай бокс ис куукунатын дириҥник билэр, Америкаҕа уон сыл олорон үлэлээбит, Георгий Чебоксаев, Бату Хасиков курдук ММА күүстээх боксердарын таһаартаабыт Андрей Владимирович Ивичук диэн тренергэ эрчиллиэҕэ. Онон Петя аан дойду “сулустарын” кытта бииргэ дьарыктаныаҕа. Профессиональнай кулуупка ирдэбил кытаанах. Тренердэр эрчийэр спортсменнарын бары өттүнэн көрөллөр – тылын-өһүн, таҥаһын-сабын, тутта-хапта сылдьарыгар, дьоҥҥо сыһыаныгар тиийэ. Ол курдук эргиччи сайыннараллар.

Профессионаллар хамаандаларыгар киирэн, Петр Васильев ыра санаата туолан, олоҕор биир сүрүн сыалын толорбутунан, бэйэтин дьоллооҕунан ааҕынар. Үүнэр-сайдар баҕата улахан. Ситиһии, кыайыы кэлэрин туһугар, тугу барытын хаалларан туран, олус күүскэ дьарыктанар санаалаах. Хотторорун сөбүлээбэт. Тренердэрэ биэрэр сорудахтарын аһара толорор. Бэрээдэги, эрэсиими эҥкилэ суох тутуһар. Онуоха кытаанах санаата, сынтарыйбат характера, бэйэтигэр эрэллээҕэ туһалыыллар.

Бокс фаната

Үлэлиирин, дьарыктанарын олус сөбүлүүр. Эппитин, эрэннэрбитин толорорго кыһаллар. Дьон олорор сириттэн тэйиччи, иһирик ойуурга, чуумпуга, иккилии көс сири кросс сүүрэр. Иллэҥ кэмэ суоҕун кэриэтэ. Арай, дьиэтигэр кыракый кыысчаанын кытта бадьыыстаһарын сөбүлүүр. Ол туһунан сүргэтэ көтөҕүллэн төһө баҕарар кэпсиэн сөп.

Петр Васильев инники сыала-соруга элбэх, өссө күүскэ үлэлиир, эрчиллэр бигэ санаалаах. Спортсмен ситиһиитэ, тахсыыта тренертэн быһаччы тутулуктаах диир. Онон Москваҕа профессионаллар хамаандаларыгар ылбыттарын астынарын, үөрэрин биллэрэр. Спорка менеджердэр уонна промоутердар оруоллара уонна суолталара улаханын тоһоҕолоон бэлиэтиир. Дьокуускай куорат баһылыга Евгений Григорьевка уонна СӨ спорка миниистиригэр Леонид Спиридоновка өйөбүллэрин иһин махталын тиэрдэр.

Сэтинньи ый бүтүүтүгэр Петр профессионаллар рингэлэригэр тахсара күүтүллэр.  Спортсмен сөптөөх титуллары ылан, рингэҕэ киирсэрин тохтотон, саха боксердарын профессионаллар боксаларыгар киллэрэн, аан дойдуга биллэр-көстөр спортсменнары  таһаартыыр санаалаах.

Ити курдук, 28 саастаах профессионал-боксер Петр Васильев улахан спорка бастакы боччумнаах хардыыларын оҥорон эрэр. Хас биирдии спортсмен иннигэр турар сыалы-соругу толороро тус бэйэттэн тутулуктаах диир. Спорт бу көрүҥэр бэйэтин “аччыгынан” ааҕынар, хайа баҕарар ыарахан сорудаҕы толорорго бэлэм.

Петр Васильевка ситиһии тосхойдун!