“САХАЛЫЫ БУУКУБААР” СЫҺЫАРЫЫТА

Андроид уонна Айфон платформаларга “Сахалыы буукубаар” диэн бэртээхэй сыһыарыы тахсыбытын элбэх киһи истибит буолуохтаах. Арсений Колодезников былырыын сайын ыччат “Синергия Севера” фестивалыгар 100 000 солкуобай суумалаах Грант сүүйэн, бырайыагын номнуо App store-га уонна Play market-ка таһаарда.

“Киһи дойдутуттан ыраата бардаҕына, төрөөбүт сирин-уотун ордук сыаналыыр эбит. Мин ону аан бастаан аармыйаҕа сылдьан билбитим. Атын дойду, омук дьонугар бэйэм дойдум, норуотум, култуурам туһунан киэҥник тарҕатар, дьоҥҥо билиһиннэрэр ирдэнэрин өйдөөбүтүм. Хантан сылдьарбын, кимҥин-туоххун, дойдум айылҕатын уратытын, омугум менталитетын, норуотум олоҕун хаачыстыбатын, төрүт аһым, таҥаһым о.д.а. туһунан олус элбэҕи билиэхтээхпин. Сыыйа “бэйэм дойдум историятын, төрөөбүт тылбын билбэт буоллахпытына, кэнэҕэһин оҕолорбун хайдах иитэбитий?” диэн санааҕа күүскэ ылларбытым. Санаабын, ырабын дириҥэтэн, аныгы оҕо эйгэтигэр чугас буолар туһуттан, төлөпүөҥҥэ сахалыы сыһыарыы оҥорор туһунан толкуйга кэлбитим. “Маннык сыһыарыы баар, төлөпүөҥҥэр хачайдаан көр эрэ” диэн тутан олорон көрдөрөргө даҕаны астык”, — диэн кэпсиир сыһыарыы ааптара Арсений Колодезников.

Талааннаах айтишник бу иннинэ Google Play Маркекка дьүһүннэр сыһыарыыларын оҥорбут, салгыы сыыппаралары ылсан баран, кэмигэр саҥардан испэккэ, сотуллан хаалбыт.

Оттон “Сахалыы буукубаар” диэн буруолуу сылдьар саҥа сыһыарыыта, үчүгэйэ диэн, өҥнөөх, баттаатахха, буукуба дорҕооно чуолкайдык иһиллэр, ол буукубаттан тахсар предмет, кыыл-сүөл ойуута көстөр уонна нууччалыы тылбааһа, омуктуу тылынан транскрипцията суруллан тахсар. Уопсайа 40 буукуба уонна 4 дифтонг киирбит. Ону таһынан мөлтөхтүк истэр оҕолорго аналлаах азбукалаах.

“Оҕоҕо бэйэтигэр сыҥалаан кэбиспэккэ, төрөппүт тэҥҥэ ылсан иһэрэ ордук көдүүстээх буолуоҕа. Инникитин сыыппаралары, өҥнөрү уо.д.а. киллэриэххэ сөп”, — диэн ааптар санаатын үллэстэр.

Бу сыһыарыыны хачайдаан, оҕолоргутугар сахалыы буукубаары үөрэтиҥ!