Саха учуонайдара электричество уотунан хааччыйар оҥоһукка патент ыллылар

Хоту улуустарга, сорох дьоҕус бөһүөлэктэргэ интэриниэт ситимэ, электричество уота күн бүгүҥҥэ диэри «киһилии» үлэлээбэтэ кистэл буолбатах.

М.К. Аммосов аатынан ХИФУ учуонайдара көс олохтоох норуоттарга анаан электричество уотунан хааччыйар тэрили оҥорон, ону туоһулуур патент ылары ситистилэр. Хоту дойду усулуобуйатыгар олус туһалаах тэрили оҥорууга М.К. Аммосов аатынан ХИФУ Чукоткатааҕы филиалын уопсай дьиссипилиинэлэр хаапыдыраларын преподавателэ Майя Артемьева уонна төрдүс куурус устудьуона Симеон Айневтегин үлэлэспиттэр. Ааптардар оҥоһуктара эрэллээҕин уонна туһанарга табыгастааҕын бэлиэтииллэр.

«Араас температураттан электрическэй энергияны ылыы ньымата 19-с үйэттэн баар. Холобура, сэрии саҕана уоту котелоктан ылаллара. Маннык тэриллэри хайыы үйэ Арассыыйаҕа оҥорон таһаараллар эрээри, биһиги оҥоһукпут конструкциятынан уонна кутталы үөскэппэтинэн уратылаах. Маны таһынан, оҥоһукпут атын тэриллэртэн бары өттүнэн икки төгүл чэпчэки»,- диэн быһаарар Майя Артемьева.

Инновационнай тэрил көс олохтоох норуоттар күннээҕи олоххо көрсөр кыһалҕаларын учуоттаан оҥоһуллубута кэрэхсэбиллээх. Устудьуон уол Симеон бэйэтэ тымныы айылҕалаах Чукотка төрүт олохтооҕо буолан, хоту сир олоҕун-дьаһаҕын этинэн-хаанынан үчүгэйдик билэр.