Саха тылын, литературатын уонна төрүт култуура учууталлара баһылык бириэмийэтин туттулар

Муус устар 27 күнүгэр баһылык Евгений Григорьев киин куорат үөрэх кыһаларын саха тылын, литературатын уонна төрүт култуура бастыҥ учууталларыгар 100 000  солк. кээмэйдээх бириэмийэлэри туттарда. 
«Уопсастыбаҕа уонна үүнэр көлүөнэ духуобунай-сиэр-майгы өттүнэн сайдыытыгар учуутал оруолун бэлиэтээн туран, бу бириэмийэ дойду баһылыга Владимир Путин биллэрбит Учуутал уонна уһуйааччы сылынан Саха Өрөспүүбүлүкэтин күнүгэр туттарыллар.
Куорат оскуолаларын учууталларын уонна уһуйааччыларын бастыҥ уопута үөрэх атын кыһаларыгар туһаныллыаҕа диэн эрэнэбин», - диэн бэлиэтиир Евгений Григорьев.
«Нуучча оскуолатыгар саха тылын, литературатын уонна төрүт култууратын үөрэтиигэ бастыҥ учуутал» анал аат Таися Егоровна Кулакинаҕа, В.И. Малышкин аатынан 23 №-дээх уопсай үөрэхтээһин орто оскуолатын (кэккэ предметтэри дириҥэтэн үөрэтэр) учууталыгар ананна. 
«Сахалыы оскуолаҕа саха тылын, литературатын уонна төрүт култуураны үөрэтиигэ бастыҥ учуутал» анал аатынан Майя Виссарионовна Осипова, «Саха-политехническэй лицей» МАОУ учуутала, наҕараадаланна.
«Сахалыы уһуйаан бастыҥ иитээччитэ» хайысхаҕа 100 000 солк. кээмэйдээх бириэмийэ хаһаайынынан Мария Михайловна Петрова, Е.Г Корнилова аатынан 51 №-дээх «Кэскил» оҕо саадын иитээччитэ, наҕараадаланна. 
Санатар буоллахха, саха тылын, литературатын уонна төрүт култуура бастыҥ учууталларыгар бириэмийэ олохтооһун туһунан Дьокуускай куорат баһылыгын 30п №-дээх уурааҕа быйыл, 2023 сыл олунньу 13 күнүгэр, баттаммыта.