Саха сирин кыһыныгар анаммыт бэстибээл-күрэх ыытыллар

Бэстибээл-күрэх тэрийээччилэрэ – өрөспүүбүүлүкэтээҕи Норуот айымньытын уонна социальнай-култуурунай технологиялар дьиэлэрэ, Култуура уонна духуобунай сайдыы управлениета, Уокуруктааҕы норуот айымньытын киинэ, Хатас сэлиэнньэтин «Тускул» култуура киинэ.

Тэрээһиҥҥэ кыттарга Саха сирин улуустарыттан уонна куораттарыттан идэтийбэтэх толорооччулары, уус-уран самодеятельность кыттыылаахтарын, айар кэлэктииптэри, фотографтары, худуоһунньуктары, декоративнай-прикладнай айымньы самодеятельнай маастардарын ыҥыраллар.

Бэстибээл-күрэх номинацияларынан, жанрдарынан уонна сааһынан категорияларга арааран  ыытыллыаҕа. Куонкурус матырыйаала тиэмэтигэр сөп түбэһиэхтээх.

Бастакы номинация – «Хаартыска искусствота». Куонкурус кэтэх көрүҥүнэн ыытыллар. Кыттааччылар 14 саастарын ааспыт буолуохтаахтар уонна 3-тэн элбэх хаартысканы ыыппаттар, хайысхалара: «Кыһыҥҥы пейзаж», «Мэтириэт», «Кыһыҥҥы дьиктилэр». Үлэлэри электроннай почтаҕа туталлар: naristruchkova@mail.ru.

Иккис номинация – «Декоративнай-прикладной айымньы». Куонкурус эмиэ кэтэх көрүҥүнэн ыытыллар Бу номинацияҕа 7 саастарыттан кытталлар. Ханнык баҕарар тиэхиньикэнэн, араас матырыйаалтан оҥоһуллубут үлэлэри туттарыахха сөп. Үлэлэри электроннай почтаҕа туталлар: vilenamila_1212@mail.ru.

Үһүс номинация – «Вокальнай айымньы», сирэй көрүҥүнэн ыытыллар. Манна бэстибээл тиэмэтигэр барсар биирдии ырыалаах ансаамбыллар уонна кэлэктииптэр кытталлар. Сайаапкалары электроннай почтаҕа туталлар: оkorokofftan87@mail.ru.

«Үҥкүү» номинация эмиэ сирэй көрүҥүнэн ыытыллар. Кыттааччылар – ансаамбыллар уонна кэлэктииптэр, бэстибээл тиэмэтигэр барсар биирдии үҥкүүлээх буолуохтаахтар. Сайаапкалары электроннай почтаҕа туталлар: dayaanai@inbox.ru.

Сирэй көрүҥүнэн ыытыллар куонкурустар 2023 сыл ахсынньы 1-2 күнүгэр Хатас сэлиэнньэтин «Тускул» култуура киинигэр буолуохтара.

Түмүк уонна наҕараадалааһын хас биирдии номинациянан, саастарынан арааран тус-туспа ыытыллыаҕа:

- I, II, III степеннээх лауреат;

- I, II, III степеннээх дипломант;

- бэстибээл кыттыылааҕын диплома.

Итини сэргэ педагогическай үлэҕэ үрдүк ситиһиилэрин уонна бэстибээл куонкурсун кыттааччыларын бэлэмнээбиттэрин иһин «Бастыҥ маастар-педагогка» анал диплом туттарыллыаҕа.