Саха сирин 400-тэн тахса олохтооҕо «Пушкинскай каартаны» оҥотторбут

Национальнай художественнай музей дьиэтигэр култуура тэрилтэлэрин салайааччылара уонна өрөспүүбүлүкэ култуураҕа миниистирэ кыттыылаах «Пушкинская карта» бырагыраама олоххо кииритигэр анаммыт пресс-конференция буолан ааста. Саха сиригэр ити каартаны 400-тэн тахса киһи оҥотторбут, федеральнай бырайыакка өрөспүүбүлүкэ култууратын 5 тэрилтэтэ кыттыбыттар. 
«Пушкинская карта» бырагыраама 14-тэн 22 саастарыгар диэри ыччат ортотугар култуураны пропагандалыыр сыаллаах оҥоһуллубут. Бырайыак Арассыыйа үрдүнэн балаҕан ыйын 1 күнүттэн 13 мөл гражданнарга туһуланан саҕаламмыт, каарта балансатыгар 3 тыһыынча солкуобай баар. Ити харчыны култуура тэрилтэлэригэр – музейдарга, театрдарга туттуохха сөп. Тэрээһиннэр афишалара Культура.РФ порталга уонна «Госуслуги. Культура» сыһыарыыга баар. Дойду үрдүнэн 1,5 мөл тахса киһи каартаны оҥотторбут, бырагыраамаҕа 500-тэн тахса култуура тэрилтэлэрэ кыттыспыттар. 
СӨ култуураҕа миниистирэ Юрий Куприянов иһитиннэрбитинэн, региоҥҥа 5 култуура тэрилтэтэ бырагыраамаҕа кыттыспыт:
Д.К. Сивцев-Суорун Омоллоон аатынан судаарыстыбаннай опера уонна балет Театра,
А.С. Пушкин аатынан судаарыстыбаннай академическай нуучча драматическай Театра,
Г.М. Кривошапко аатынан өрөспүүлүлүкэ судаарыстыбаннай Филармонията,
 «Россия — моя история» Музей комплекса,
Саха сирин Национальнай художественнай музейа.
«Алтынньы 1 күнүттэн бырагыраамаҕа өссө элбэх култуура тэрилтэрэ кыттыһыахтара. Билиҥҥи туругунан 464 киһини регистрациялаатыбыт, уопсайа Дьокуускай куоракка 20-тэн тахса тыһыынча, оттон өрөспүүбүлүкэ үрдүнэн 50-ча тыһыынча киһини хабабыт», — диэтэ миниистир.
Бырагыраама үлэҕэ киириэҕиттэн өрөспүүбүлүкэ Филармонията каарталаахтарга 3 тыһыынчаттан тахса солкуобай суумалаах 9 билиэти, Национальнай художественнай музейа 30 тыһыынча солкуобай кэриҥэ суумалаах 58 билиэти, Нуучча театра 40 тыһыынча солкуобайга 101 билиэти, оттон опера уонна балет Театра 314 тыһыынча солкуобайга 421 билиэти батарбыттар. Ити социальнай ситимнэр нөҥүө уонна үөрэҕирии тэрилтэлэрин кытта бииргэ үлэлээһин түмүктэрэ диэн бэлиэтэннэ.