Саха сиригэр сымыыт сыаната үрдээбит, ол оннугар балык сыаната түспүт

Тохсунньу ыйга биир киһи ыйдааҕы сүрүн аһын сыаната Саха сиригэр 9 613,0 солкуобайга тэҥнэһэн, ааспыт ыйдааҕар 0,7% үрдээбитэ бэлиэтэммит.

Сахастат чахчытынан, ыйытыкка кыттыбыт оройуоннартан муҥутуур үрдүк сыана Зырянка бөһүөлэгэр бэлиэтэммит – 12 770,1 солк., муҥутуур намыһах сыана – Нерюнгри куоракка (8 342,3 солк.).

Биирдиилээн сүрүн бородуукталарынан ыллахха, 2024 сыл тохсунньу ыйыгар ааспыт ыйдааҕар ордук куурусса сымыыта үрдээбит – 2,9%, ол кэннэ ынах арыыта (1,8%), үүт, сыыр (1,5%), бурдук (1,3%), үрүҥ килиэп (1,2%), хара килиэп (0,6%), кумах саахар (0,2%) кэлэллэр.

Маны сэргэ тоҥнуу хараллыбыт балык сыаната 2,2% намтаабыт, мас арыыта – 1,1%, рис – 0,6%.

Эт аһылыктан ынах этэ 2,1% үрдээбит, сибиинньэ этэ – 0,9%, куурусса этэ – 0,7%.

Оҕуруот аһыгар сыана оҕурсуга 14,2% үрдээбит, хаппыыста, моркуоп – 1,5%, дьаабылака – 0,7%, ол оннугар хортуоппуй сыаната – 0,5%, эриэппэ луук 1,9% түспүт.

Арассыыйа үрдүнэн биир киһи ыйдааҕы сүрүн аһын орто сыаната 6 017,0 солк. тэҥнэспит.

Оттон атын ыаллыы регионнары кытта тэҥнээтэххэ, хартыына маннык буолбут: