Саха сиригэр суол үлэтэ 67 % туолла
«Национальнай бырайыактары олоххо киллэрии дьон олоҕун тупсарарга, табыгастаах эйгэни тэрийэргэ туһуланар. Былааннаммыт тэрээһиннэр Саха сиригэр олорор гражданнар тустарыгар хаачыстыбалаахтык, үрдүк таһымҥа ыытыллыахтаахтар. Быйыл национальнай бырайыактарга көрүллүбүт үбүлээһин рекорднай, 67 млрд солкуобай кэриҥэ», – диэн бэлиэтээн эттэ Ил Дархан.
«Куттала суох уонна хаачыстыбалаах суоллар» национальнай бырайыак чэрчитинэн 2023 сылга 277 км үлэҕэ киириэхтээх, ол иһигэр 71 км регионнааҕы массыына суолларыгар уонна 29 км Дьокуускай куорат уокуругар.
Регионнааҕы 248 км уһуннаах 33 эбийиэккэ үлэ ыытыллар. Киин куорат 29 км уулусса-суол ситимигэр 19 эбийиэккэ үлэ барар. Билиҥҥи туругунан 47 км 10 эбийиэккэ үлэ түмүктэннэ, ол иһигэр 8 регионнааҕы уонна 2 Дьокуускай территориятыгар.
«Уоннааҕы учаастактарга ууну ыытар турбалары, сир болотунатын уонна таҥаһын оҥороллор. Былааннаммыт 277 км уһуннаах сиргэ 186 км таҥастааһын уурулунна, ол эбэтэр үлэ 67 %-на туолла», – диэн иһитиннэрдэ тырааныспар уонна суол хаһаайыстыбатын миниистирэ Владимир Сивцев.
«Куттала суох уонна хаачыстыбалаах суоллар» национальнай бырайыак дойду суолларын бары өттүнэн табыгастаах оҥорорго анаммыт. Арассыыйа бэрэсидьиэнэ Владимир Путин көҕүлээбит национальнай бырайыактара 2019 сылтан саҕаламмыттара. Ити кэмтэн Саха сиригэр 2,5 тыһыынчаттан тахса км суол тутулунна, 49 муостанан туоруур суол уларытан оҥоһулунна. Ил Дархан эппитинэн, кэлэр 5 сыл иһигэр эмиэ итиччэ таһымнаах үлэ барыахтаах, ол иһигэр Өлүөнэ өрүһү туоруур муоста тутуллуохтаах.
Сонуннар
Ордук ааҕаллар
