Саха сиригэр «Куттала суох муус» аахсыйа саҕаланна
Ахсынньы 21 күнүттэн 28 күнүгэр диэри «Куттала суох муус» сэрэтэр тэрээһин чэрчитинэн Госавтоинспекция Дьоҕус суудуналар судаарыстыбаннай инспекцияларын уонна административнай хамыыһыйалары кытта тырааныспар көҥүлэ суох мууска киирэрин эриэйдэлэринэн хонтуруоллууллар. Өрөспүүбүлүкэҕэ сорох мууһунан туоруур сирдэр арыллыбыттара, ол эрэн ыарахан уйуктаах тиэхиньикэҕэ хааччахтааһын оннунан турар. Бобууну истибэккэ биирдиилээн дьон уоран туорууллара аҕыйаҕа суох.
Госавтоинспекция тырааныспар көҥүлэ суох мууска киирэрэ дьон олоҕор сэрэхтээҕин туһунан өссө төгүл сэрэтэр. Билиҥҥи туругунан көҥүл бэриллэн арыллыбатах мууһунан туоруу сатыыр олус кутталлаах, муус лаппа халыҥаабатах буолуон сөп.
СӨ судаарыстыбаннай былааһын уорганын нормативнай быраап аакталарынан уонна олохтоох бэйэни салайыныы уоргана киллэрбит хааччахтааһыннарын кэмигэр, көҥүллэнэ илик сирдэргэ – өрүстэргэ, күөллэргэ уонна да атын уу эбийиэктэригэр тырааныспарынан киирии иһин гражданнарга үс тыһыынчаттан биэс тыһыынча солкуобайга диэри, юридическай сирэйдэргэ сүүс тыһыынчаттан биир мөлүйүөн солкуобайга диэри административнай ыстараап көрүллэр.
Сонуннар
Ордук ааҕаллар
