Саха сиригэр 7 саҥа оскуола арыллыаҕа

Дойду бэрэсидьиэнэ Владимир Путин көҕүлээбит «Үөрэхтээһин» национальнай бырайыак чэрчитинэн, сыл бүтүөр диэри 7 саҥа оскуола үлэҕэ киириэҕэ диэн Өрөспүүбүлүкэ бастакы вице-премьера Дмитрий Садовников бэрэссэдээтэллээх тутуу штабын мунньаҕар иһитиннэрдилэр.

Ол курдук, Жатай бөһүөлэгэр 360 миэстэлээх оскуола тутуллар. Аллайыаха улууһун Чокурдаах бөһүөлэгэр уонна Кэбээйи улууһун Сайылык сэлиэнньэтигэр 275 миэстэлээх оскуолалар тутулла тураллар. Эбээн Бытантай Баатаҕай Алыыта сэлиэнньэтигэр 220 миэстэлээх, Амма улууһун Абаҕа сэлиэнньэтигэр 150 үөрэнээччигэ уонна 70 кырачааҥҥа аналлаах оскуола-уһуйаана тутуллан бүтэн эрэллэр.

Дьокуускайга Е.Ю. Келле-Пелле аатынан 26-с №-дээх оскуолаҕа салҕааһын, П.Н. уонна Н.Е. Самсоновтар ааттарынан Хатас оскуолатыгар эбии тутуу оҥоһуллар.

«Үгүс эбийиэк график быһыытынан тутулла турар, ол эрэн бырайыактыыр-симиэтэлиир докумуону чопчулааһынтан, матырыйаал кэлиитигэр кэккэ кыһалҕалартан уонна үлэһит тиийбэтиттэн сорох сирдэргэ бытаарыы тахсар. Болдьохторугар үлэҕэ киллэрэр курдук бары боппуруостары суһаллык быһаарыахпыт», – диэтэ тутуу миниистирэ Виктор Романов.

Этиллибит 7 оскуоланы таһынан, Саха сиригэр 2024 сылга үлэҕэ киириэхтээх аҕыс эбийиэк тутулла турар. Саамай элбэх тутуу Дьокуускайга ыытыллар:

- кадетскай оскуола интэринээттээх үөрэнэр куорпуһа,

- 4-с №-дээх анал (коррекционнай) оскуола,

- 153-с кыбаартал оскуолата,

- 350 миэстэлээх доруобуйаларынан хааччахтаах оҕолору социальнай адаптациялыыр, төгүрүк суукканан үлэлиир комплекс,

- 29-с №-дээх оскуолаҕа салҕааһын тутуу.