Саха сирэ байыаннай эпэрээссийэни өйүүр

Тэрээһиҥҥэ СӨ бырабыыталыстыбатын Бэрэссэдээтэлэ Андрей Тарасенко, куорат баһылыгын солбуйааччы Наталья Степанова, СӨ Уопсастыбаннай балаататын бэрэссэдээтэлэ Николай Бугаев, «Ассоциация ветеранов боевых действий органов внутренних дел и внутренних войск Республики Саха (Якутия)» уопсастыбаннай тэрилтэ бырабылыанньатын бэрэссэдээтэлэ Николай Гребенников, уопсастыбаннай тэриллиилэр бэрэстэбиитэллэрэ, тэрилтэлэр салайааччылара, «итии туочукалар» бэтэрээннэрэ, устудьуоннар кытыннылар.

СӨ бырабыыталыстыбатын Бэрэссэдээтэлэ Андрей Тарасенко анал байыаннай эпэрээссийэни өйүүрүн биллэрдэ уонна Саха сириттэн Украинаҕа көҥүл өттүнэн барбыттар билигин Ростов куоракка баалларын иһитиннэрдэ.

«Көҥүл өттүнэн барбыт биир дойдулаахтарбыт этэрээттэрэ бойобуой соругу хорсуннук толоруохтара диэн эрэнэбин. Кинилэргэ дириҥ ытыктабылбытын уонна махталбытын биллэрэбит», - диэтэ Андрей Тарасенко.

Куорат баһылыгын солбуйааччы Наталья Степанова норуот дойдубут Бэрэсидьиэнэ Владимир Путин тула түмсүбүтүн уонна кини талбыт хайысхатын өйүүрүн бэлиэтээтэ.

«Сэрии 1941-1945 ыарахан сылларыгар норуоппут Ийэ дойдутун көмүскээн сомоҕолоспута. Бүгүн биһиги Донбасс олохтоохторун кытта фашизмы кытта охсуһууга биир сомоҕобут», - диэн эттэ Наталья Степанова.

СӨ Уопсастыбаннай балаататын бэрэссэдээтэлэ Николай Бугаев Украинаттан тэскилээччилэри өйүүр тэрээһиннэр тустарынан кэпсээтэ.

«Биһиги Донецкай норуодунай өрөспүүбүлүкэ босхоломмут Волновахатыгар гуманитарнай көмөнү түҥэтэр кэммитигэр олохтоохтор көмөбүт иһин махтаналлара уонна Арассыыйа кинилэр территорияларыттан барбатыгар көрдөһөллөрө», - диэн бэлиэтээтэ Николай Бугаев.

«Ассоциация ветеранов боевых действий органов внутренних дел и внутренних войск Республики Саха (Якутия)» уопсастыбаннай тэрилтэ бырабылыанньатын бэрэссэдээтэлэ Николай Гребенников, «Биир Ньыгыл Арассыыйа» баартыйа регионнааҕы политсэбиэтин чилиэнэ Петр Черкашин, Саха сиринээҕи дьахталлар тэрилтэлэрин сойууһун бэрэссэдээтэлэ Анжелика Андреева анал байыаннай эпэрээссийэни өйүүллэрин уонна көҥүл өттүнэн барааччыларга махталларын биллэрдилэр.