«Саха Өрөспүүбүлүкэтин 100 сыллаах сайдыытын былаана» коммуникационнай сессия түмүктэннэ

Бырайыак бастакы түһүмэҕэ олоххо киириитин кэмигэр, эдэр тэрийээччилэр сыл аҥаара бүтүн өрөспүүбүлүкэни кэрийэн, сайдыыга туһуламмыт элбэх идиэйэлэри хомуйбуттарын «Саха Өрөспүүбүлүкэтин 100 сыллаах сайдыытын былаана» коммуникационнай сессияны түмүктээһиҥҥэ СӨ Ил Дархана Айсен Николаев бэлиэтээбит. Бырайыагы чулуу суруйааччы уонна общественнай-политическай деятель Платон Ойуунускай  1927 сыллаахха Саха сирин 2027 сылга диэри сайдыытын былаанын суруйбут «Улуу сүүс сыллаах былаан» айымньыта көҕүлээбит. Ол туһунан Уокуруктааҕы дьаһалта пресс-сулууспата иһитиннэрдэ.
«Судаарыстыбаннас сүүс сылын тухары Саха сирин олохтоохторо дойдуну кытта бииргэ айыы-тутуу уонна сайдыы сылларын, тыҥааһыннаах уонна ыарахан кэмнэрин ааспыттара.  Тыйыс кэмнэр биһиэхэ аан дойду ураты хартыынатын үөскэппиттэрэ, тулалыыр эйгэни кытта дьүөрэлэһэн, хас биирдии киһиэхэ кыһаллан, биир санааланан олорорго үөрэппиттэрэ», – диэн бэлиэтээбит  Айсен Николаев .  
Саха сирин Баһылыга сыралаах үлэтин иһин махтанан туран Москваттан кэлбит социоконструктор Денис Коричиҥҥа «Гражданскай килбиэн» бэлиэни туттарбыт.
Тэрийээччилэр бырайыагы өйөөбүт муниципальнай оройуон баһылыктарыгар уонна бэрэстэбиитэллэригэр Махтал суруктары туттартаабыттар. Махтал суругу Дьокуускай куорат баһылыга Евгений Григорьев эмиэ туппут. 
Түмүктүүр стратегическай сессияҕа сүүс сыллаах былааҥҥа сыһыаннаах дьоһун этиилэри истибиттэр. Итини сэргэ, чугаһынааҕы былаан докумуонугар киириэхтээх бырайыактары бэлиэтээбиттэр. Олор ортолоругар Саха сирин култууратын үрдэтиигэ, тымныыны капитализациялыырга, микрополистары тэрийэргэ, ньочоото суох оҥорон таһаарыыга, тутууга уонна промышленноска саҥа матырыйааллары туһаныыга туһуламмыт чопчу бырайыактар бааллар.