Сааскы хомуурга 600-чэкэ саллаат ыҥырыллыаҕа

2023 сыл муус устар 1 – от ыйын 15 күннэригэр Дьокуускайга аармыйаҕа сааскы хомуур буола турар. 
Киин куорат байыаннай хамыһаара Евгений Крупенков иһитиннэрбитинэн, Илиҥҥи байыаннай уокурук ыстаабын сорудаҕынан 2023 сыллааҕы сааскы хомуурга Дьокуускай куораттан 600 кэриҥэ саллаат ыҥырыллыахтаах. Аармыйаҕа ыҥырыллыбыттар бары сулууспаларын Арассыыйа территориятыгар, чуолаан Илиҥҥи байыаннай уокурук чаастарыгар ааһаллар. Донецкай, Луганскай норуодунай өрөспүүбүлүкэлэргэ, Херсонскай, Запорожскай уобаластарга ыытыллыбаттар. 
Бэлиэтээн эттэххэ, быйылгыттан аармыйаҕа сулууспалыыр саастарын сиппит гражданнарга бэбиэскэ тус кэбиниэттэригэр электроннай көрүҥүнэн кэлэрин туһунан федеральнай сокуон номнуо ылылынна. Ол туһунан биһиги “Киин куорат” хаһыат саҥа нүөмэригэр сырдаттыбыт: https://kiinkuorat.ru/articles/elektronnay-bebieske-tuttu 
Чуолаан, саҥа сокуон сүрүн өрүттэрэ:
– Судаарыстыбаннай уонна муниципальнай өҥөлөр порталларын нөҥүө бэбиэскэ туппут дьон 20 хонук иһигэр военкомакка тиийиэхтээхтэр.
– Бэбиэскэ тутан баран тугу да гымматах киһи массыына атыылаһара, уруулга олороро, кирэдьиит ылара, хамсаабат баайы-дуолу бэйэтин аатыгар регистрациялыыра, “самозанятай” статуһугар эбэтэр предприниматель быһыытынан регистрацияланара көҥүллэммэт.
– Бэбиэскэ туппут киһи Арассыыйа кыраныыссатыттан тахсыбат. Военкомакка кэлэн барбыт киһиэхэ эрэ, биллэн турар, оруннаах төрүөттээҕин дакаастаатаҕына эрэ, бу хааччах көтүрүллүөн сөп.
– Учуокка илэ бэйэҕитинэн эрэ тиийэн тураҕыт.
– Арассыыйа байыаннай саппааһыгар военкомакка бэлиэтэммэтэх да дьону киллэриэхтэрин сөп буолла.
– Почтанан кумааҕынан ыытыллыбыт бэбиэскэ, илии баттаан заказной суругу ылбыт буоллаххытына, илиигитигэр туттарыллыбытынан ааҕыллар.
– Электроннай бэбиэскэ кумааҕы бэбиэскэҕэ тэҥнэстэ.
– Электроннай бэбиэскэ судаарыстыбаннай өҥө порталыгар тус кабинекка кэлбит күнүттэн күнэ ааҕыллан барар, 7 күн ааспытын кэннэ бэбиэскэлэр реестрдэригэр киирдэҕинэ, киһиэхэ туттарыллыбытынан аатырар.