11.06.2021 | 15:30

Саҥа мусуойу көрдүбүт

Былырыын тохсунньу 4 күнүгэр Дьокуускай куорат Автодорожнай уул., 9 г, аанын тэлэччи аспыт саҥа мусуойга сырыттыбыт.
Саҥа мусуойу көрдүбүт
Ааптар: Киин Куорат

Тохсус этээскэ лиибинэн дырылатан таҕыстыбыт, манна эргэ тиэхиньикэ бары мааркатын көрүөххэ сөп. Сууйуллан-сотуллан, өрөмүөннэнэн, саҥаларыгар түспүт массыыналар кэккэлээн, килэбэчийэн тураллар. Былыргы "Победа", "Волга" , "Запорожец", байыаннай массыыналар, оннооҕор сэрии саҕана саллааттарга хааһы түҥэтэн аһаппыт  полевой куукуна – барыта кэлбит киһини кэрэхсэтэр. Чурапчыттан төрүттээх сэрии бэтэрээнэ Гаврил Ефимов "Аврора " диэн ааттаах киинэҕэ устар кыра кээмэйдээх, дьоҕус камератын кыыһа бэлэхтээбитэ биир бастыҥ миэстэҕэ көрдөрүүгэ суруктанан- бичиктэнэн сытар. Дьокуускай куораттан Поповтар дьиэ кэргэннэрэ былыргы таҥас ыскаабын, остуол, олоппос, хомуот биэрбиттэрэ бииргэ тураллар. Өссө хомуот үрдүгэр үс сиэркилэлээх трильяж турарын уйадыйа көрдүм. 1970 сыллаахха сайын эдьиийим Мария Петровналыын уочараттаан аҕай ылан, дойдубутугар таһаарбыппыт, дьоммут олус үөрбүттэрэ.Ол хомуот үрдүгэр турар сиэркилэҕэ оччотооҕу киһи өйдүүр открыткаларын кыбыппыттар, иннигэр урукку одьукулуон, духуу, пудра, помада бааллар.

Урукку сэниэ, мааны ыал олорбут утуйар хосторун, куукуналарын тэрийбиттэр. Таҥаһы-сабы, иһити-хомуоһу, малы-салы барытын хомуйан көрдөрүүгэ туруорбуттара аныгы ыччакка улахан иитэр- үөрэтэр суолталаах. Бастакы тэлэбиисэрдэр, патефон, чох өтүүгэ, таҥас кирин анньар этирик, хаҥкы, кэнсиэрбэлэр, чэйдэр бааллар, остуол сабыыларын, бүлүүс көбүөрдэри, сылабаардары уо.д.а. наһаа уруургуу көрдүбүт. "Биһиэхэ бу баара, ити ол ыалга баар этэ", – диэн өрө халаатыы түһэҕин. Аргыһым Екатерина Семёновна: "Сэбиэскэй былаас саҕанааҕы слоннаах чэй амтана олох атын буолара, сыта дьиэ иһин ылан кэбиһээччи», – диэбитигэр кыыс чэй кутан биэрээри гынна, тиэтэйэн аккаастанныбыт ээ.

Сальва Григорий Иванович дириэктэрдээх олус туһалаах, сонун, бу эргин ханан да суох үчүгэй мусуойу олус астына, дуоһуйа, биһирии, кэрэхсии, үөрэ-көтө көрдүбүт. Эдэр эрдэҕинээҕи олохпутугар төннөн, олорон кэлбит курдук буоллубут, дьоммутун да санатта. Гараастары киирэн көрдүбүт, массыыналар эстакада устун өрө сүүрэн тахсан, анал уйаларыгар дьылыс гыналлар, хаһаайыттар халыр гына хатаат, киинэҕэ көстөрүн курдук, тахсан баран хаалаллар. Дьэ, сайдыы балысханнык баран иһэр диэн сыаналаатыбыт.

Дьиэбэр кэлэн иккис кылааһы бүтэрбит кыра сиэммэр кэпсээбиппин, миигин тоҕо илдьибэтэххитий диэн олуйуста. Куорат ити мусуойга сылдьа илик олохтоохторо, ыалдьыттар, көрөргө тиэтэйиҥ диэн ыҥырабын. Эһигини олус аламаҕай үлэһиттэр үөрэ көрсүөхтэрэ.

     АННА  КОЗЛОВА,

           Дьокуускай.

Сонуннар

Ордук ааҕаллар

Төлөн: «Кэрэни туойарбыттан дуоһуйабын»
Дьон | 18.06.2021 | 19:46
Төлөн: «Кэрэни туойарбыттан дуоһуйабын»
Бу күннэргэ балаһабар дьоруой көрдөөн биир дойдулаахпар, буолаары буолан ийэм төрөөбүт сириттэн төрүттээх, Өнөр Эбэтэ дуо дэппит Уус Алдан улууһун биир кэрэ-мааны айылҕалаах, дьэдьэн, хаптаҕас силигилии үүнэр, сардаана сибэккинэн симэммит алаастардаах, лэһигирэс көмүс хатырыктааҕынан аатырбыт Өнөртөн төрүттээх киһини дьүөгэм булан биэрдэ. Онон, билсиҥ, хоһоон хонуутугар хорутуулаахтык суруйар, оһохчут быһыытынан улууһугар...
Станислав Свинобоев Бухарестка уһаарыллыыта
Спорт | 11.06.2021 | 10:24
Станислав Свинобоев Бухарестка уһаарыллыыта
Станислав Свинобоев Бухарестка уһаарыллыыта Мэҥэ Хаҥаластан төрүттээх, 18 саастаах Станислав Свинобоев саас Иркутскайга 21-гэр диэри саастаахтарга көҥүл тустууга  Арассыыйа чемпиона буолбута. Итинник түһүлгэттэн кыһыл көмүс мэтээл кэлбэтэҕэ 11 сылыгар  эбиитин орто ыйааһыҥҥа  70 кг аҕалыыта уонна атырдьах ыйыгар Башкортостан киинигэр Уфаҕа ыытыллыахтаах аан дойду 21-гэр диэри саастаахтарга чемпионатыгар Арассыыйа чиэһин...
Киин куоракка коррупцияны утары научнай-практическай конференция ыытыллар
Сонуннар | 17.06.2021 | 18:30
Киин куоракка коррупцияны утары научнай-практическай конференция ыытыллар
Дьокуускайга бэс ыйын 16-17 күннэригэр коррупцияны утары судаарыстыбаннай политика тыын боппуруостарыгар научнай-практическай конференция буола турар.  Конференция онлайн көрүҥүнүнэн барар. Дискуссионнай балаһааккаҕа судаарыстыбаннай былааска уонна олохтоох бэйэни салайыныы уорганнарыгар коррупцияны уонна сокуону кэһиини сэрэтэр сыаллаах салаалар бэрэстэбиитэллэрэ Уһук Илин регионнарыттан кытталлар. Конференцияҕа кыттаары Дьокуускайга РФ Президенин Управлениетын уонна РФ Президенин Уһук...
Рекорд үөһэ рекорд!
Спорт | 11.06.2021 | 10:29
Рекорд үөһэ рекорд!
Аатырбыт дэгиттэр спортсмен  Василий Николаев кэриэһигэр атах оонньууларыгар өрөспүүбүлүкэ чемпионата элбэх саҥа рекордааҕынан историяҕа киирдэ. Өрөбүллэргэ  «Туймаада» стадиоҥҥа 13 улуус,   Дьокуускай, ХИФУ,   АГАТУ ааттарыттан 40 спортсмен  кытынна. Биир  ыйынан  Манчаары оонньуулара буолаары турарынан, спортсменнар эрчиллиилэрин күүһүрдүбүттэрэ ырааттаҕа.   ЯПК 1 кууруһун устудьуона, сабыылаах сиргэ күрэхтэһиигэ өрөспүүбүлүкэ рекордсмена  Валерия Олесова үс көрүҥ...