Саҥа дьыллааҕы көрдөөх оонньуулар

Тымныы Оҕонньорго суруйабыт

Оонньууну ыытааччы дьон иннигэр тахсар уонна Тымныы Оҕонньорго сурук суруйа сатаабыта сатамматаҕын туһунан иһитиннэрэр, 15 ханнык баҕарар даҕааһын ааты толкуйдуурга ыҥырар.

Уонна ол тыллары туттан маннык суругу ааҕар:

«_____ Моруос Оҕонньор! Биһиги_______оҕолорбут Саҥа дьылы олус кэтэспиттэрэ, ону, хата,_______тиийэн кэллиҥ. Саҥа дьыл биһиги дьиэ кэргэҥҥэ саамай_______бырааһынньык. Биһиги эйиэхэ_______ырыалары,_______үҥкүүлэри толоруохпут! _______Саҥа дьылбыт дьэ үүннэ! Бүгүн_______үөрэх, _______үлэ туһунан санаамыахха. Үөрэхпитигэр_______сыаналары, үлэбитигэр_______хамнаһы ылыахпыт диэн эрэннэрэбит. Ол иһин_______кэһиилээх мөһөөччүккүн арыйа охсон,_______бэлэхтэргин туттар.

Ытыктабылы кытта,_______уолаттар уонна_______кыргыттар!»

Баҕа санаалаах телеграмма

Бу сырыыга ыытааччы кыһыны кытта сыһыаннаах даҕааһын ааттары кыттааччылар этэллэринэн сурунар уонна маннык телеграмманы ааҕан иһитиннэрэр:

Квчк Биир_______ дойдуга зпт биир ______ куоракка _______ кэрэ аҥаардар уонна _______ эр бэртэрэ олорбуттар тчк Олорбуттар-олорбуттар уонна биир _______  хампаанньанан _______  билсэр буолбуттар тчк Биир _______ күн маннык ______ сиргэ мустан зпт көрсөн зпт _______ саҥа дьылы бэлиэтииргэ санаммыттар тчк Бүгүн хайаан да _______ тостар этилинниннэр зпт бакааллар ______  утаҕынан туоллуннар зпт остуол _______  аһынан баай буоллун зпт бу мустубут дьон _______ мичээрэ үксүү турдун тчк Саҥа үүммүт сылгыт _______ буоллун зпт эһигини _______ дьон тулалаатын зпт _______ баҕа санааларгыт туолан истиннэр зпт үлэҕит-хамнаскыт _______ буоллун зпт чугас киһигит зпт тапталлааххыт _______ эрэ бэлэхтиир буоллун всклц

Эһиги _______ Тымныы Оҕонньоргут квчк

Шариктарынан

Шариктарынан элбэх оонньууну толкуйдуохха сөп. Холобура, үрүөх иннинэ иһигэр баҕа санаалаах кумааҕылары угаҕыт. Ону кыттааччылар шаригы тэһэ тутан баран доргуччу ааҕан иһитиннэрэллэр. Төһө баҕарар баҕа санааны, эҕэрдэни күлүүлээхтик суруйан угуохха сөп.

Гелийинэн үрүллүбүт шариктарга кумааҕыга суруллубуту баайыахха сөп, кыттааччылар олору кырыйан ылан ааҕаллар.

Баҕа санаалар оннуларыгар сорудахтары суруйар оонньууну ураты тыынныан сөп.

Сыыппараларынан

Ыытааччы 3 кыттааччыттан ханнык баҕарар 11 сыыппараны ыйытан сурунар.

Онтон интервью ылбыт курдук туттан-хаптан, хоруйдары маннык ыйытыыларга туруоран биэрэр:

Хас саастааххыный?

Күҥҥэ хаста тото аһыыргын сөбүлүүгүн?

Хаҥас атаххар хас тарбахтааххыный?

Ыйааһыныҥ төһөнүй?

Кылааскар хаста хаалбыккыный?

Хас чааска утуйаҕын?

Төһө лиитирэни биирдэ иһэҕин?

Мороженайы бастаан хас сааскар амсайбыккыный?

Эбиэккэ хас тэриэлкэ миини иһээччигиний?

Хас тиистээххиний?

Хас мүнүүтэнэн бу харыйа анныгар охто сытар буолуоххунуй?

Малынан уонна чүмэчинэн

Мөһөөччүккэ араас маллары муһаҕыт. Кыттааччы “Бу малынан тугу гынабын?” диэн ыйытыытыгар хоруйдуур уонна түбэһиэх малы хостоон бэйэтэ эппитин толоруохтаах.

Кыттааччылар уочаратынан умайа турар бенгальскай чүмэчини илииттэн илиигэ, бу киһиэхэ тугу гыннаралларын этэ-этэ, бэрсэллэр, кимиэхэ кэлэн умуллубут – ол сорудаҕы толорор.