Сүрүн кыһалҕа – суоппар тиийбэт

«Пассажирдары тиэйиини тэрийээччи» МКУ начаалынньыга Эдуард Садовников бүгүн, кулун тутар 31 күнүгэр, «СоюзАвто» чааһынай маршруттар дириэктэрдэрин кытта көрүстэ, диэн иһитиннэрэр Олохтоох дьаһалта персс-сулууспата.

Көрсүһүү «СоюзАвто» НКО офиһыгар Дьокуускай куорат Олохтоох дьаһалтатын «Пассажирдары тиэйиини тэрийээччи» МКУ отделын салайааччыта Людмила Давыдова уонна "СоюзАвто" НКО дириэктэрэ Андрей Косицкай кыттыылаах буолан ааста.

Биллэрин курдук, кэлиҥҥи сылларга Дьокуускай куорат лаппа  кэҥээбитинэн, уулусса-суол ситимэ уларыйбытынан, нэһилиэнньэ ахсаана элбээбитинэн, 2024 сыл сааһыттан куорат оптуобустарын маршрута уларытыллыахтаах. Онуоха чааһынай тиэйээччи «СоюзАвто» НКО санаата эмиэ учуоттаныахтаах. 
Бүгүҥҥү көрсүһүүгэ өрүттэр оптуобус тохтобулун хаарын ыраастааһын, нэһилиэнньэттэн киирэр үҥсүүлэр, светофордар үлэлэрин тула кэпсэттилэр.
Чааһынай оптуобустар дириэктэрдэрэ сүрүн кыһалҕа быһыытынан суоппар тиийбэтин бэлиэтээтилэр, куорат оптуобустарыгар үлэлиэн баҕалаах «Д» категориялаах суоппардары күүтэллэрин биллэрдилэр. Суоппар хамнаһа – 60 000 солк., билсэр төлөпүөн: 8924-272-84-44, Емелёва Оксана Николаевна, электроннай почта: ooo-avtolain@mail.ru.
Кэлэр мунньаҕы ГИБДД бэрэстэбиитэллэрэ кыттыылаах ыытарга быһаарыстылар. Бэлиэтээн эттэххэ, Эдуард Садовников бу тэрилтэ салайааччытынан 2023 сыл кулун тутар 20 күнүттэн үлэлиир.