«Росмолодёжь» пуорумҥа ыҥырар

Арассыыйа үрдүнэн ыччат сайдарыгар, олоххо тирэхтээх буоларыгар араас таһымнаах пуорумнар, сэминээрдэр, күрэхтэр сылы эргиччи ыытыллаллар. 2024 сылга Арассыыйа үрдүнэн Росмолодёжь пуорумнарыгар кыттарга 14-тэн 35-гэр диэри саастаах эдэр дьону ыҥыраллар. Бэлиэтээн эттэххэ, быйылгы сылга 43 пуорум ыытыллара сабаҕаланар.

Тэрээһиннэр ыччат интэриэһин хабар, сайдыыга-үүнүүгэ кынаттыыр араас хайысхалаахтар. Быйыл медиа, дизайн, социальнай-гуманитарнай дьиссипилиинэлэр, креативнай индустриялар, наука, туризм, бизнес, карьера, экология, спорт, патриотическай иитии тиэмэлэрин тула пуорумнары ыытарга быһаарбыттар. Онон, хайа хайысхаҕа сөп түбэһэргин бэйэҥ талар кыахтааххын.

Тэрээһиҥҥэ кыттар ыччаттар биллэр-көстөр дьонтон суолталаах уонна туһалаах билиилэри ылыахтарын, Арассыыйа ханнык баҕарар регионугар саҥа доҕоттору булуохтарын, бэйэлэрин курдук толкуйдуур дьону кытта билсиэхтэрин, дойду бөдөҥ тэрилтэлэригэр стажировка барыахтарын сөп, бырайыак көмүскээн, судаарыстыбаттан көмө харчы ылар кыахтаахтар. Маны тэҥэ атын регионнарга сылдьан бэйэлэрин өйдөрүн-санааларын, билиилэрин хаҥатыахтара, атын дойду култууратын кытта билсиэхтэрэ.

Уһук Илиҥҥи уокурукка олорор ыччаттар бу пуорумнарга кыттар кыахтаахтар: “Территория.Арт”, “Машук”, “Истоки”, «Юг молодой», «Экосистема. Заповедный край», «ШУМ»,  «Амур» эдэр урбаанньыттар пуорумнара, «Ростов», «ОстроVa», «Российский Север», «Область будущего», «Инженеры будущего», оробуочай ыччат пуорума, Социальнай пуорум, «Бирюса», «Шерегеш», «iВолга», «ГосСтарт» эдэр судаарыстыбаннай уонна муниципальнай сулууспалаахтар пуорумнара, Арассыыйатааҕы  патриотическай пуорум, хаһаах ыччатын Бүтүн Арассыыйатааҕы слета, «Пик возможностей», «үрүҥ көмүс» доброволецтар  VIII-с пуорумнара, «Евразия Global» аан дойдутааҕы пуорум, #МЫВМЕСТЕ. Ыччаттар ону тэҥэ Саха сиригэр ыытыллар бары тэрээһиннэргэ көхтөөх кыттыыны ылар кыахтаахтар.

Өскөтүн эн бэйэҕин сайыннарыаххын, билиигин хаҥатыаххын, саҥа доҕоттору булуоххун, Арассыыйа атын куораттара хайдах дьаһанан олороллорун билсиэххин баҕарар буоллаххына, бу нүөмэрдэргэ эрийэн билис: +79166095443, VDuksina@fadm.gov.ru уонна +79600468660, vshapovalova@fadm.gov.ru.