Дойду баһылыгын көҕүлээһининэн 1,4 тыһ. км тахса суол оҥоһулунна

Дойду баһылыга Владимир Путин көҕүлээһининэн олоххо киирбит «Куттала суох уонна хаачыстыбалаах суоллар» нацбырайыагынан Саха сиригэр 2019-2024 сылларга 1 430 км тахса суол ирдэбилгэ эппиэттиир таһымҥа тиэрдилиннэ. 
Ол иһигэр Горнай оройуонугар «Кэбээйи» массыына суола, Хаҥалас оройуонугар «Умнас» массыына суола Тиит Арыы учаастагар, Бүлүү оройуонугар «Бүлүү» массыына суолун 524-с км - Кыһыл Сыыр, Нам оройуонугар «Нам» массыына суолун уонна «Умнас» массыына суолун Хаҥалас оройуонугар Покровскай куоракка киириитэ.
Ил Дархан Айсен Николаев Ил Түмэҥҥэ Анал этиитигэр бэлиэтээбитин курдук, «Куттала суох уонна хаачыстыбалаах суоллар» национальнай бырайыак түмүктэнэр сылыгар уопсайа 395 км усталаах уулусса-суол ситимэ оҥоһулунна. Ол курдук, ааспыт 2024 сылга биэс күргэ тутулунна: «Яна» массыына суолугар Уолчаан үрэххэ, «Өймөкөөн» массыына суолугар Куйдуһун уонна Күбүмэ күргэлэрэ, «Кэбээйи» массыына суолугар Хатыҥ Үрэх уонна «Анаабыр» массыына суолугар Чуоналыыр муосталара. 
2019 сылтан саҕалаан уопсайа 2 665 км усталаах массыына суола уонна 55 күргэ ирдэбилгэ эппиэттиир гына оҥоһулунна.
2025 сылтан «Куттала суох уонна хаачыстыбалаах суоллар» нацбырайыагы «Инфраструктура для жизни» саҥа национальнай бырайыак салгыыр, диэн иһитиннэрэр Ил Дархан уонна Бырабыыталыстыба пресс-сулууспата.