Саха сиригэр 45 тыһыынчаттан тахса киһи саҥа дьиэлэннэ

2019-2024 сылларга 45,92 тыһыынча киһи 887,66 тыһ. кв.м иэннээх хаарбах уонна саахалланар туруктаах дьиэттэн көһөрүлүннэ.
Ил Дархан Айсен Николаев Ил Түмэҥҥэ Анал этиитигэр бэлиэтээбитин курдук, Саха Өрөспүүбүлүкэтэ нэһилиэнньэни хаарбах уонна саахалланар туруктаах дьиэттэн көһөрүү бырагырааматын олоххо киллэриигэ дойду үрдүнэн инники күөҥҥэ сылдьар. 
«2025 сыл бүтүөр диэри 48 тыһыынчаттан тахса киһини көһөрөр былаан баар. Маны таһынан 11 тыһыынча киһи «Инфраструктура для жизни» саҥа национальнай бырайыагынан көһөрүллүөҕэ», - диэн турар Айсен Николаев. 
Дьокуускай куоракка 900 тыһ. кв.м иэннээх олорор дьиэни олоххо киллэрэр территориялары кэлимник сайыннарыы 8 бырайыага саҕаланыаҕа. 194 саахалланар туруктаах дьиэ саҥардыллыаҕа, киин куорат 3 тыһыынча кэриҥэ олохтооҕо олорор усулуобуйатын тупсарыныаҕа. 
Ол курдук, территориялары кэлимник сайыннарыы ньыматын олоххо киллэрии чэрчитинэн Дьокуускай куорат биир тыын кыһалҕата - эргэ кыбаарталлартан босхолонуу быһаарыллыаҕа. Манан ситимнээн Ил Дархан Дьокуускай куорат Олохтоох дьаһалтатын болҕомтотун хаарбах дьиэттэн көһөрүү былаанын атахтыыр бюрократизацияны аҕыйатарга соруйбата. 
Санатар буоллахха, территориялары кэлимник сайыннарыы былаанынан бастатан туран 2а, 2б, 2г, 4а, 4б, 4в, 17 кыбаарталлар оннуларыгар тутуллар саҥа «Спортивнай» дьоҕус оройуон хабыллар. Маны сэргэ үлэ 31-с, 53-с, 85-с кыбаарталларга (тус-туһунан), Өрүс пордун оройуонугар «Өлүөнэ очуостара» бырайыакка, Аэропорка, Кырдьаҕас куорат – 2 (55-с уонна 55а кыбаарталлар), Гериатрияҕа (ИЖС) ыытыллыаҕа.
Оттон ааспыт 2024 сылга Саха сиригэр 750 тыһ. кв.м иэннээх олорор дьиэ үлэҕэ киирдэ (2023 сыл - 705 кв.м, 2022 сыл - 315,47 тыһ. кв.м): 329 тыһ. кв/м иэннээх элбэх кыбартыыралаах олорор дьиэ уонна 421 тыһ. кв/м иэннээх чааһынай дьиэ, диэн иһитиннэрэр Ил Дархан уонна Бырабыыталыстыба пресс-сулууспата.