Роман Дмитриев турнирыгар

Кулун тутар 10-12 күннэригэр Дьокуускайга “Триумф” спорт уораҕайыгар 1972 сыллаахха Мюнхеннээҕи Олимпийскай оонньуулар көҥүл тустууга чөмпүйүөнэ, аан дойду, Европа чөмпүйүөнэ, ССРС элбэх төгүллээх чөмпүйүөнэ, ССРС спордун үтүөлээх маастара Р.М. Дмитриев кэриэһигэр норуоттар икки ардыларынааҕы турнир буолан ааста.

Быйылгы турнир Сахабыт сиригэр физкультурнай хамсааһын 100 сылыгар ананна. Турнир чэрчитинэн Хомсомуол болуоссатыгар турар  Р.М. Дмитриев пааматынньыгар сибэкки дьөрбөтүн ууруу, суруналыыстарга аналлаах пресс-конференция буоллулар, биллиилээх бөҕөстөр маастар-кылаастары оҥордулар.

Иран, Индия, Греция, Монголия курдук омук дойдуларыттан уонна урукку бырааттыы Союзнай Өрөспүүбүлүкэлэртэн, итиэннэ Арасссыыйа регионнарыттан 18-20 саастаах 260 эдэр тустуук  көбүөргэ таҕыста. Турнирга кыргыттар аан бастаан кыттыыны ыллылар.

Турнир үөрүүлээхтик аһыллыытыгар СӨ Аҕа Баһылыга Айсен Николаев, СӨ бырабыыталыстыбатын бэрэссэдээтэлин солбуйааччы Сергей Местников, Арассыыйа сүүмэрдэммит хамаандатын бэлэмниир Киин салайааччыта Александр Кызласов, Арассыыйа кыргыттарга көҥүл тустууга сүүмэрдэммит хамаандатын сүрүн тренерэ Алена Карташова эҕэрдэлэрэ дуораһыйдылар. Монреаль-1976 Олимпийскай оонньуулар, аан дойду, Европа, ССРС чөмпүйүөннэрэ, ССРС спордун үтүөлээх маастара Павел Павлович Пинигин 70 сааһынан Махтал суруктар туттарылыннылар.

Үс күннээх хапсыһыылар түмүктэринэн маҥнайгы кыайыы үөрүүтүн Р.М. Дмитриев аатынан ОЭУ иитиллээччитэ, 50 кг тустубут Александра Копылова аҕалла. Александра Копылова Арассыыйа сүүмэрдэммит хамаандатын, Бурятия тустуук кыргыттарын уонна финалга эмиэ биир хамаандаҕа дьарыктанар Надежда Куличкинаны кыайталаата.

Үөһээ Бүлүүттэн төрүттээх-уустаах, Чурапчы институтугар үөрэнэр Владимир Бояновскай 74 кг тустан, барыллааһын хапсыһыыларга Белоруссия, Красноярскай уолаттарын хотуталаан баран, финалга Коми Өрөспүүбүлүкэтиттэн Сергей Пушкин туста тахсыбатаҕынан кыайыыны быһа сурунна, Арассыыйа уонна Саха сирин хамаадатыгар кыһыл көмүс мэтээли аҕалары ситистэ.

Ити курдук, Сахабыт сирин тустуук ыччаттара 11 мэтээли ыллылар: Владимир Бояновскай 74 кг, Александра Копылова 50 кг, Евгения Огородникова 57 кг, Лилия Рожина 68 кг – кыһыл көмүс мэтээллэри уонна биилгэ кэтэр курдары, Надежда Куличкина 50 кг, Лев Павлов 57 кг, Артем Слепцов 61 кг, Роман Николаев 79 кг – үрүҥ көмүс, Николай Заболоцкай 57 кг, Айтал Громов 61 кг, Михаил Нестеров 125 кг боруонса мэтээллэри сэргэ, туһааннааҕынан, 35-25-15 тыһ. солк. сертификатынан наҕараадаланнылар.

Уолаттарга Иран хамаандата биэс, Арассыыйа түөрт (Бурятия икки, Саха сирэ, Осетия – биирдии), Белоруссия биир кыһыл көмүс мэтээллээхтэр.

Аны биир ыйынан, муус устар ыйга, Дьокуускайга ыччаттар ортолоругар Арассыыйа чемпионатын көбүөрэ тэлгэниэҕэ.