Роман Дмитриев кытылын тупсаран оҥоруу 2024 сыл бэс ыйыгар диэри түмүктэниэҕэ

Куорат баһылыга Евгений Григорьев Роман Дмитриев кытылын тупсаран оҥорууну «Азия оҕолоро» норуоттар икки ардыларынааҕы оонньуу иннинэ, 2024 сыл бэс ыйыгар диэри түмүктүүргэ сорудахтаата диэн Олохтоох дьаһалта пресс-сулууспата иһитиннэрдэ.

Куорат баһылыга ыыппыт көһө сылдьар мунньаҕар Олохтоох дьаһалта тутууга структурнай салаалара,  бэдэрээтчит «Кинг-95» ХЭТ бэрэстэбиитэллэрэ кытыннылар.

«Главстрой» МХТ дириэктэрэ Алексей Варламов бэлиэтээбитинэн, бүгүҥҥү күҥҥэ эбийиэккэ сирин уларытыы уонна болотунатын оҥоруу ыытыллар.

«Бэдэрээтчит урукку аспаал бүрүөһүнүн алдьатан бүтэрдэ. Билигин суол төрүтүн уларыталлар, суолга бөдөҥ хайыр тааһы куталлар. Аспааллааһын уонна суол икки өттүттэн тротуардары көтүрүү кэлэр сылга былааннанар», - диэтэ Алексей Варламов.

Бэдэрээтчит тэрилтэ бэрэстэбиитэллэрэ иһитиннэрбиттэринэн, тыы станциятыттан Хабаров уулуссатын кытта быһа охсуһар суолга диэри учаастакка 7 оробуочай, 3 самосвал, суол катога, грейдер уонна экскаватор үлэлииллэр.

Санатар буоллахха, Роман Дмитриев аатынан кытылы тупсаран оҥоруу Дьокуускай куорат маастар-былаанын олоххо киллэрии чэрчитинэн ыытыллар. Саха сирин куораттарын сайыннарыыга 3,3 млрд солкуобай казначейскай кирэдьиит көрүлүннэ, ол иһигэр  1,5 млрд солкуобай киин куорат уопсастыбаннай туоналарын – Ленин болуоссатын, Сайсары күөлүн уонна 202-с дьоҕус оройуоҥҥа Роман Дмитриев аатынан кытыллары тупсаран оҥорууга.