Режиссёр Никита Аржаковка РФ искусстволарын үтүөлээх деятелэ аат иҥэрилиннэ

Арассыыйа бэрэсидьиэнэ Владимир Путин ыйааҕынан «Сахафильм» киинэ хампаанньатын туруорааччы-режиссёругар Никита Аржаковка РФ искусстволарын үтүөлээх деятелэ аат иҥэрилиннэ.

 «Ити Никита Иннокентьевич бүтүн олоҕун анаабыт үлэтин билиниинэн буолар. Саха кинематографын билинии. Ис сүрэхпиттэн Никита Иннокентьевиһы үтүөлээх аатынан эҕэрдэлиибин», - диэтэ Ил Дархан Айсен Николаев.

Бастакы «Тулабыт барыта хайалар» киинэни режиссёр 1995 сыллаахха таһаарбыта. Кини устубут «Тайвань арыы» (1998), «Аэроплан» (2003), «Хара мааска» (2003), «Снайпер Саха» (2010) уо.д.а. киинэлэрэ көрөөччү улахан сэҥээриитин ылбыттара. 2020 сыллаахха Никита Аржаков сүдү үлэтэ – «Тыгын Дархан» историческай хартыыната тахсыбыта.