Өрөбүллэргэ «Саха сирин балыга - 2023» дьаарбаҥка ыытыллыаҕа

Дьокуускай куорат Аччыгый баһаарын балаһааккатыгар, алтынньы  28-29 күннэригэр, үгэс буолбут «Саха сирин балыга - 2023» быыстапка-дьаарбаҥка ыытыллыаҕа диэн СӨ Тыатын хаһаайыстыбатын министиэристибэтэ иһитиннэрдэ.

Бэйэлэрин бородууксуйаларын тыа хаһаайыстыбатын кооперативтара, арктическай улуустар общиналара, балык бородууксуйатын эйгэтигэр үлэлиир урбаанньыттар аҕалыахтара. Тэрээһин ыалдьыттарын үгэс буолбут «Полевая уха» уонна дегустация күүтэр.

«Саха сирин балыга» быыстапка-дьаарбаҥка балыгынан дьарыктанар хаһаайыстыбалары уонна чааһынай оҥорон таһаарааччылары өйүүр сыаллаах ыытыллар. Куорат олохтоохторо хаачыстыбалаах, сибиэһэй бородууксуйаны тыа хаһаайыстыбатын оҥорон таһаарааччыларыттан чэпчэки сыанаҕа атыылаһар кыахтаныахтара», – диэн бэлиэтээтэ өрөспүүбүлүкэ тыатын хаһаайыстыбатын уонна ас-үөл политикатын миниистирэ Артем Александров.

Быыстапка-дьаарбаҥка Аччыгый баһаар балаһааккатыгар (Киров уул., 12/1в, Кырдьаҕас куорат оройуона) 10:00 чаастан 17:00 чааска диэри ыытыллыаҕа.